Stała viadoma imia piataha abmienienaha špijona, jakoha Polšča addała Rasii
Zahadkavym špijonam, čyjo imia nie nazyvałasia, a tvar schavali za bafam, akazaŭsia kazachski vajenny ataše, jaki pracavaŭ u Kijevie i špijoniŭ na karyść Rasii. Mienavita siońnia Alaksandr Łukašenka pahavaryŭ z prezidentam Kazachstana Kasym-Žamart Takajevym.
Učora na polska-biełaruskaj miažy prajšoŭ abmien zatrymanymi pa formule «piać na piać». Biełaruś pieradała Polščy žurnalista Andreja Pačobuta, manacha Hžehaža Havieła i Tomaša Biarozu, asudžanaha pa abvinavačańni ŭ špijanažy. Taksama ŭ ramkach abmienu Rasija pieradała Małdovie dvuch supracoŭnikaŭ małdaŭskich śpiecsłužbaŭ, zatrymanych u Rasii.
Siarod tych, kaho pieradała Polšča, — asudžany ŭ Małdovie za dziaržaŭnuju zdradu były namieśnik kiraŭnika słužby infarmacyi i biaśpieki Małdovy Alaksandr Bełan, biełarus Uładzisłaŭ Nadziejka, zatrymany ŭ Polščy pa abvinavačańni ŭ špijanažy, rasijski archieołah Alaksandr Buciahin i zatrymanaja ŭ Małdovie hramadzianka Rasii Nina Papova.
Imia piataha ŭdzielnika abmienu, pieradadzienaha ŭ Biełaruś, nie nazyvałasia.
Kazach na słužbie Kramla
Polskaja presa zhadvaje pra toje, što polskaha katalickaha śviatara Hžehaža Havieła abmianiali na aficera kazachstanskaj vajskovaj raźviedki.
Čałaviekam, jakoha Polšča pieradała ŭ adkaz, imavierna, staŭ Anuar Bakibaj — pamočnik vajskovaha ataše pasolstva Kazachstana va Ukrainie, aryštavany ŭ Polščy pa padazreńni ŭ špijanažy na karyść RF.
38‑hadovy dypłamat byŭ zatrymany ŭ polskim horadzie Bydhašč 30 lipienia 2025 hoda.
Kazachstanskaja presa tady pisała, što Ukraina nie mahła zatrymać Bakibaja praz dypłamatyčny imunitet i pieradała infarmacyju ŭ Polšču.
Dypłamat špijoniŭ dla Kramla nie tolki va Ukrainie, ale i jeździŭ dla hetaha ŭ Jeŭropu — źbirać infarmacyju pra abjekty NATO.
Vypadak Bakibaja staŭ dokazam zaležnaści kazachstanskich śpiecsłužbaŭ ad Kramla. «Hetaje zatrymańnie stała pramym śviedčańniem taho, pra što my havorym na praciahu mnohich hadoŭ: śpiecsłužby Kazachstana zachoŭvajuć sistemnuju zaležnaść ad Kramla i niaredka dziejničajuć u intaresach rasijskich struktur, uklučajučy raźviedvalnyja i hibrydnyja apieracyi», — pisali pravaabaroncy i aktyvisty ŭ liście ŭ struktury ES.
Siońnia ž Alaksandr Łukašenka stelefanavaŭsia z prezidentam Kazachstana Kasym-Žamart Takajevym. Pavodle paviedamleńnia pres-słužby, jany abmierkavali pašyreńnie dvuchbakovych suviaziaŭ, abmianialisia vinšavańniami z Dniom Pieramohi, a taksama Łukašenka znoŭ zaprasiŭ naviedać Biełaruś z aficyjnym vizitam.
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma12
Kamientary
Kłouny i liciemiery.