Nie stała instytuta, jaki stvaraŭ hienpłany Minska i vyznačaŭ zialonyja zony ŭ horadzie. Horadabudaŭnikoŭ padparadkavali prajekciroŭščykam daroh i raźviazak
«Minskhrada», jaki vyznačaŭ stratehiju raźvićcia dvuchmiljonnaha horada na praciahu amal tryccaci hadoŭ, dałučyli da «Minskinžprajekta».
Abmierkavańnie hienieralnaha płana Minska ŭ 2015 hodzie. Fota: greenbelarus.info
Aktyvisty raniej užo zaŭvažali, što horadabudaŭničyja dakumienty, jakija raniej byli prerahatyvaj śpiecyjalizavanaha instytuta «Minskhrada», apošnim časam vykonvajuć niaprofilnyja prajektnyja arhanizacyi.
Tłumačeńnie pryčyny možna znajści ŭ abviestcy na sajcie «Minskhrada», jakaja kaža, što zhodna z rašeńniem Minharvykankama ad 24 śniežnia 2025 hoda arhanizacyja rearhanizujecca šlacham dałučeńnia da «Minskinžprajekta». Sam praces źlićcia jurydyčna musiŭ zaviaršycca jašče 23 krasavika 2026 hoda. A 1 maja — pierastać adkryvacca i sajt «Minskhrada» ź jaho archivam horadabudaŭničaj dakumientacyi pa Minsku i vakolicach, ale pakul hetaha nie adbyłosia.
Nadmahille z hadami isnavańnia «Minskhrada» na sajcie instytuta. Fota: minskgrado.by
Charakterna, što abviestku na sajcie «Minskhrada» supravadžaje malunak nadmahilla z vybitymi na im datami žyćcia: 18.04.1996-18.04.2026. Horadabudaŭničy instytut «pamior» na svoj 30‑hadovy jubilej.
Historyja «Minskhrada» pačałasia ŭ krasaviku 1996 hoda, kali majsterniu hienieralnaha płana vyvieli sa składu mahutnaha «Minskprajekta» i pieratvaryli ŭ asobnaje pradpryjemstva. Pieršapačatkova kalektyŭ składaŭsia ŭsiaho z troch dziasiatkaŭ architektaraŭ, ale z časam instytut razrośsia da sotni supracoŭnikaŭ i niekalkich bujnych majsterniaŭ.
Śpiecyjalisty «Minskhrada» ŭpieršyniu ŭ historyi horada raspracavali vyraznyja rehłamienty dla hramadskich, žyłych i łandšaftnych terytoryj, zamianiŭšy imi raniejšyja supiarečlivyja narmatyvy savieckaha času.
Uvachod u instytut, jaki raźmiaščaŭsia ŭ domie na rahu Revalucyjnaj i Kamsamolskaj vulic. Fota: Jandeks Karty
Za try dziesiacihodździ instytut stvaryŭ hienieralnyja płany stalicy 2003, 2010, 2016 i 2025 hadoŭ, a taksama raspracavaŭ bolš za sotniu detalovych płanaŭ dla kankretnych rajonaŭ. Mienavita tut prajektavali rekanstrukcyju histaryčnaha centra Minska i zakładvali horadabudaŭničyja abhruntavańni dla najbujniejšych inviestycyjnych prajektaŭ, uklučajučy šmatfunkcyjanalny kompleks «Minsk-Śviet».
Važnaj častkaj pracy instytuta była dziejnaść łandšaftna-ekałahičnaha adździeła. Śpiecyjalisty «Minskhrada» raspracavali ŭnikalnuju dla krainy schiemu ekałahičnych kalidoraŭ Minska, sutnaść jakoj palahała ŭ rehulavańni vyšynnaści zabudovy takim čynam, kab nie pierakryvać naturalnyja patoki vietru i ratavać ščylna zabudavany miehapolis ad pierahrevu i chimičnaha smohu.
Akramia taho, horadabudaŭniki ŭpieršyniu stvaryli schiemy azielanionych terytoryj ahulnaha karystańnia dla ŭsich rajonaŭ stalicy, jurydyčna zamacavaŭšy miežy isnujučych i pierśpiektyŭnych parkaŭ, skvieraŭ i haradskich lasoŭ.
Jany ž raspracavali schiemu achoŭnych zon dla asabliva achoŭnych pryrodnych terytoryj i schiemu vodna-zialonaha dyjamietra, jakaja ŭličvała pryrodny patencyjał haradskich rek i vadaschoviščaŭ. Na kampjutarach instytuta stvaralisia składanyja madeli prahnozu chimičnaha i akustyčnaha zabrudžvańnia ad transpartu i pramysłovaści dla roznych žyłych rajonaŭ.
«Minskinžprajekt», jaki pry kancy 2024 hoda adznačyŭ svajo piacidziesiacihodździe, histaryčna zajmaŭsia prajektavańniem vyklučna ŭtylitarnaj infrastruktury. Jaho kalektyŭ z amal čatyrochsot čałaviek śpiecyjalizujecca na prajektavańni voda-, ciepła-, haza– i enierhazabieśpiačeńnia, kanalizacyi, daroh, mastoŭ i puciepravodaŭ.
Nakolki zachavajecca struktura horadabudaŭničaha pradpryjemstva ŭ składzie inšaha instytuta, pakul nieviadoma, jak i toje, ci budzie kamuści sprava da aeracyi staličnaj zabudovy i zialonych terytoryj, kali asnoŭnaja zadača ciapier staić budavać aŭtamabilnyja darohi i raźviazki.