U Mjanmie znajšli rubin-hihant

U mjanmanskim rehijonie Mahok u vobłaści Mandałaj niadaŭna byŭ znojdzieny vielmi redki i vialiki rubin. Pra znachodku paviedamili dziaržaŭnyja ŭłady krainy.

Fota: moi.gov.mm

Pavodle pradstaŭnikoŭ Ministerstva pryrodnych resursaŭ i achovy navakolnaha asiarodździa Mjanmy, znojdzieny rubin važyć 2200 hramaŭ, abo kala 11 tysiač karataŭ. Śpiecyjalisty adznačajuć, što heta nadzvyčaj bujny i redki kamień, jaki ciažka sustreć u pryrodzie.

Rubin maje čyrvona-fijaletavy koler z žaŭtavatym adcieńniem i ličycca kaštoŭnym dziakujučy vysokaj jakaści koleru. Taksama paviedamlajecca, što kamień vałodaje dobraj prazrystaściu i jarkim šklanym blaskam. Asobna padkreślivajecca, što rubin zastaŭsia ŭ naturalnym vyhladzie i nie prachodziŭ štučnaj apracoŭki abo palapšeńnia.

Fota: moi.gov.mm

Ułady Mjanmy nahadali, što rehijon Mahok užo daŭno viadomy jak adzin z hałoŭnych suśvietnych centraŭ zdabyčy rubinaŭ. Tut raniej taksama znachodzili inšyja ŭnikalnyja kaštoŭnyja kamiani. U 1990 hodzie byŭ adkryty rubin vahoj 496,25 karata (99,25 hrama), u 1996 hodzie — uvohule hihancki kamień vahoj 21450 karataŭ (4 290 hramaŭ), a ŭ 2022 hodzie — rubin vahoj 2789,25 karata (557,85 hrama).

Choć rubin 1996 hoda zastajecca najbujniejšym pavodle vahi, novy kamień ličycca bolš kaštoŭnym dziakujučy lepšym koleravym i jakasnym charaktarystykam.

Usie hetyja redkija rubiny byli znojdzienyja mienavita ŭ rajonie Mahok, jaki ličycca adnym z samych bahatych radoviščaŭ kaštoŭnych kamianioŭ u śviecie.

Kamientary da artykuła