U Polščy rychtujuć maštabnyja źmieny ŭ atrymańni hramadzianstva
Urad krainy płanuje ŭzmacnić praviły atrymańnia polskaha hramadzianstva.
U MUS krainy zajavili, što hramadzianstva pavinna być «pryvilehijaj, jakuju treba zasłužyć», piša telehram-kanał «Biełarusy ŭ Polščy».
Siarod prapanavanych źmien:
— abaviazkovy ekzamien na hramadzianstva — test z pryblizna 40 pytańniaŭ na viedańnie historyi, kaštoŭnaściej i zakonaŭ Polščy, a taksama ŭzroŭniu intehracyi ŭ hramadstva.
— padpisańnie akta łajalnaści da polskaj dziaržavy,
— vysoki ŭzrovień vałodańnia polskaj movaj — nie nižej za B2,
— minimum 8 hadoŭ pražyvańnia ŭ Polščy,
— najaŭnaść polskaha padatkovaha rezidenctva.
U MUS tłumačać, što meta reformy — pavysić status polskaha hramadzianstva i ŭstalavać vyraznyja patrabavańni dla tych, chto poŭnaściu intehravaŭsia ŭ polskaje hramadstva.
Na fonie abmierkavańniaŭ praciahvajucca i palityčnyja sprečki. Raniej prezident Polščy Naŭrocki prapanavaŭ ułasny prajekt, zhodna ź jakim minimalny termin bieśpierapynnaha pražyvańnia dla atrymańnia hramadzianstva pavinien być pavialičany z 3 da 10 hadoŭ.
U kancy krasavika 2026 hoda apazicyjnaja partyja «Zakon i spraviadlivaść» uniesła na razhlad zakonaprajekt, jaki praduhledžvaje kardynalnaje ŭzmacnieńnie praviłaŭ atrymańnia hramadzianstva dla zamiežnikaŭ.
Prapanujecca «nulavaja talerantnaść» da chulihanskich pravaparušeńniaŭ i parušeńniaŭ hramadskaha paradku z boku zamiežnikaŭ. Za paŭtornaje padobnaje parušeńnie prapanujuć aŭtamatyčna departavać parušalnika.
Apazicyja choča ŭvieści nastupnyja ŭmovy atrymańnia hramadzianstva dla zamiežnikaŭ:
— pavialičany minimalny termin asiełaści pry naturalizacyi — 10 hadoŭ zamiest ciapierašnich troch;
— pavialičany termin dla asob, jakija znachodziacca ŭ šlubie z hramadzianinam Polščy — šeść hadoŭ zamiest troch;
— pavialičany termin bieśpierapynnaha pražyvańnia dla asob z polskimi karaniami i Kartaj palaka — piać hadoŭ zamiest adnaho hoda;
— abaviazkovaje viedańnie polskaj movy na ŭzroŭni C1 zamiest siaredniaha B1;
— zdača śpiecyjalnaha dziaržaŭnaha ekzamienu na viedańnie polskaj kultury i historyi.