Biełaruska kaža, što jaje muža-niebaraku ŭ Loźnie skrali armianie i pradali ŭ šturmaviki ŭ rasijskuju armiju. Toj, napeŭna, užo trup
Aksana Ancipienka ź Lozna šukaje svajho sužyciela, jaki trapiŭ u rasijskija šturmaviki pry nievierahodnych abstavinach. «Pryjechali dvoje armian sa Smalenska da znajomaha, paklikali našaha vypić, toj vyjšaŭ — i bolš nie pryjšoŭ! Prymusam vyvieźli i pradali ŭ vajskovuju čaść u šturmaviki!», — płača Aksana i śćviardžaje, što spravaj zajmajecca Śledčy kamitet.
«Našaj Nivie» stała viadomaja historyja 48‑hadovaha roznarabočaha ź Lozna Jaŭhiena Simanienkava.
Pa słovach jaho sužycielki Aksany Ancipienki, Simanienkaŭ trapiŭ u šturmavoje padraździaleńnie rasijskaj armii napačatku 2026 hoda pry zahadkavych abstavinach.
Apošniaje fota Simanienkava, jakoje toj dasłaŭ svajakam. Niedzie va ŭkrainskim stepie ŭ formie rasijskaj armii. Fota z archiva Aksany Ancipienki.
«Pryjechali ŭ Biełaruś dvoje armian, braty sa Smalenska, da svajho znajomaha. Toj znajomy paklikaŭ našaha na vulicu dla raśpićcia śpitnych napojaŭ. Vyjšaŭ i bolš nie pryjšoŭ! Vynik: pazvaniŭ i paviedamiŭ, što padpisaŭ kantrakt u Smalensku pad pahrozaj rasstrełu. Miedkamisiju nie prachodziŭ, pavieźli ŭ Varoniež pad nahladam, bankaŭskija kartki i sim-kartku, na jaki zarehistravany mabilny bankinh, adabrali hetyja ž armianie. I tak imi byŭ vyviezieny nie tolki naš bajec. U hety čas Śledčy kamitet rasśleduje hetuju spravu. Vielmi spadziajusia, što vinavatych pakarajuć!», — śćviardžaje Aksana Ancipienka.
Jaŭhien Simanienkaŭ sprava. Fota: Adnakłaśniki
U hety momant jana sprabuje vyśvietlić harotny los svajho sužyciela. Vykrali jaho naprykancy lutaha, u sakaviku jon užo trapiŭ u v/č 31985, atrymaŭ pazyŭny Simon, a ŭ pačatku krasavika pajšoŭ na bajavoje zadańnie i pierastaŭ vychodzić na suviaź.
U sacyjalnyja sietki Jaŭhien apošni raz zachodziŭ 3 krasavika 2026 hoda.
Pa infarmacyi z baz Belpol viadoma, što Jaŭhien zajmaŭsia niekvalifikavanaj pracaj. Rabiŭ valščykam lesu, raznarabočym, budaŭnikom.
U 2004 hodzie Simanienkaŭ pabiŭ svajho sabutylnika tak, što toj pamior.
U Jaŭhiena jość 25‑hadovy syn ad inšaj žančyny, ale loźnieniec paśladoŭna ŭchilaŭsia ad vypłaty alimientaŭ, bo nie moh znajści ŭ Biełarusi pracu. Jeździŭ pierabivacca na budaŭničyja vachty ŭ Rasiju.