Vijahra moža stać paratunkam i dla žančyn — ale ŭ inšaj prablemie, ličać navukoŭcy

Vijahru vykarystoŭvajuć nie tolki dla palapšeńnia mužčynskaj patencyi.

Ilustracyjny malunak, stvorany z dapamohaj štučnaha intelektu

Za apošnija hady daśledčyki vyjavili, što preparat i jaho dziejučaje rečyva siłdenafił moža źnižać ryzyku sardečnych zachvorvańniaŭ, insultu i dyjabietu, a taksama vykarystoŭvacca pry lačeńni pavialičanaj prastaty.

Ciapier navukoŭcy źviarnuli ŭvahu i na prablemu, ź jakoj sutykajecca vielizarnaja kolkaść žančyn, — dysmienareju, abo balučuju mienstruacyju. Havorka idzie nie prosta pra dyskamfort, a pra mocnyja boli ŭnizie žyvata i tazavaj vobłaści, jakija mohuć addavać u śpinu i ściohny. Častku žančyn padčas mienstruacyi taksama mučać młosnaść, vanity, dyjareja, hałaŭny bol, stomlenaść, niervovaść i hałavakružeńnie.

Siońnia asnoŭnymi mietadami baraćby z dysmienarejaj zastajucca harmanalnaja kantracepcyja, biezrecepturnyja abiazbolvalnyja nakštałt niesteroidnych supraćzapalenčych preparataŭ, a taksama chatnija srodki — naprykład, hrełka. Ale jany dapamahajuć nie ŭsim.

U ciažkich vypadkach žančyny časam vymušanyja iści na histerektamiju — apieracyju pa vydaleńni matki. Takaja pracedura całkam spyniaje mienstruacyi, ale razam z hetym pazbaŭlaje mahčymaści mieć dziaciej.

Vydańnie The New York Post źviarnuła ŭvahu na daśledavańnie, praviedzienaje vučonymi z Charvatyi. U ekśpierymiencie ŭdzielničali žančyny va ŭzroście ad 18 da 35 hadoŭ, jakija pakutavali ad umieranaj abo mocnaj dysmienarei.

U papiarednich daśledavańniach užo vyvučaŭsia ŭpłyŭ vijahry na intensiŭnaść mienstrualnych bolaŭ. Navukoŭcy vyjavili, što preparat moža palahčać bol u vobłaści taza. Adnak pry pryjomie tabletak unutr u mnohich žančyn uźnikali pabočnyja efiekty — najčaściej hałaŭny bol. Tamu daśledčyki vyrašyli pasprabavać inšy sposab i ŭvodzili razavuju dozu ŭ 100 milihramaŭ vahinalna.

Jak adznačali aŭtary artykuła, apublikavanaha ŭ časopisie Human Reproduction, taki sposab uviadzieńnia vielmi efiektyŭny dla preparataŭ miascovaha dziejańnia. Kali leki traplajuć blizka da patrebnaha orhana, heta dapamahaje pamienšyć pabočnyja efiekty. Siarod hałoŭnych pieravah takoha sposabu — dobraje krovazabieśpiačeńnie i toje, što preparat nie prachodzić spačatku praź piečań.

Vyniki abnadziejvali. U žančyn, jakija atrymlivali siłdenafił, adznačałasia źmianšeńnie bolu i palapšeńnie kryvacioku padčas mienstrualnaha cykłu. Pry hetym daśledčyki nie zafiksavali surjoznych pabočnych efiektaŭ.

Adnak daśledavańnie tak i nie ŭdałosia davieści da paŭnavartasnaha zaviaršeńnia. U im uziali ŭdzieł tolki 25 žančyn: 13 atrymali preparat, astatnija — płaceba. Navukoŭcam nie chapiła ŭdzielnic, a paźniej prajekt straciŭ finansavańnie. Akramia taho, aŭtary daśledavańnia pryznali, što čatyrochhadzinnaje nazirańnie za pacyjentkami mahło być zanadta karotkim, kab acanić poŭny efiekt preparata.

Prablemy ź finansavańniem stali nie adzinaj pieraškodaj. Daśledčyki paviedamlali, što hrantavyja zajaŭki na vyvučeńnie pieradmienstrualnaha sindromu i mienstrualnaha bolu adchilalisia praź mierkavańnie, što takija prablemy nibyta pierabolšanyja abo niedastatkova značnyja dla surjoznaj navuki.

Tym nie mienš cikavaść da temy nie źnikła. U minułym miesiacy ŭ amierykanskim dziaržaŭnym rejestry kliničnych daśledavańniaŭ ClinicalTrials.gov, dzie publikujecca infarmacyja pra miedycynskija ekśpierymienty z usiaho śvietu, źjavilisia źviestki pra novaje daśledavańnie, jakoje płanujuć pravieści vučonyja z Čykaha (ZŠA).

Jany chočuć pravieryć, ci sapraŭdy vahinalna ŭviedzieny siłdenafił zdolny pamianšać praźmiernyja skaračeńni matki i palahčać bol padčas mienstruacyi. Pakul što daśledčyki tolki rychtujucca da naboru ŭdzielnic, ale sam fakt zapusku novaha kliničnaha vyprabavańnia śviedčyć, što ideju nie pakinuli.

Kamientary da artykuła