ZŠA damaŭlajucca z Danijaj pra adkryćcio novych vajskovych baz u Hrenłandyi

ZŠA viaduć aktyŭnyja zakrytyja pieramovy z Danijaj i pradstaŭnikami Hrenłandyi pra mahčymaść pašyreńnia amierykanskaj vajskovaj prysutnaści na vostravie. Pavodle śviedčańniaŭ niekalkich krynic, u apošnija miesiacy pieramovy prasoŭvajucca, choć adbyvajucca biez šyrokaj publičnaści, piša Bi-bi-si.

Dackija vajskoŭcy ŭ Hrenłandyi. Zdymak ilustracyjny. Fota: Juliette Pavy/Bloomberg via Getty Images

Amierykanski bok choča adkryć try novyja vajskovyja bazy na poŭdni Hrenłandyi. Ich hałoŭnaja zadača — nazirańnie za vajskovaj i marskoj aktyŭnaściu Rasii i Kitaja ŭ Paŭnočnaj Atłantycy, asabliva ŭ stratehična važnym rehijonie pamiž Hrenłandyjaj, Isłandyjaj i Vialikabrytanijaj.

Pieramovy prachodziać u ramkach najaŭnaj damoŭlenaści 1951 hoda pamiž ZŠA i Danijaj, jakaja dazvalaje ZŠA mieć vajskovuju prysutnaść u Hrenłandyi pry zhodzie Danii. U minułym u ZŠA tam było značna bolš baz (kala 17 u pieryjad Chałodnaj vajny), ale ciapier zastałasia tolki adna asnoŭnaja — kaśmičnaja baza Pitufik, jakaja vykarystoŭvajecca dla nazirańnia za rakietami.

U pieramovach udzielničajuć vysokapastaŭlenyja dypłamaty i čynoŭniki z ZŠA, Danii i Hrenłandyi. Z amierykanskaha boku praces kaardynuje pradstaŭnik Dziarždepartamienta, a z dackaha — ambasadar i pradstaŭnik Hrenłandyi ŭ ZŠA. Sustrečy adbyvalisia niekalki razoŭ z pačatku hoda.

Paralelna ZŠA sprabujuć źniać dypłamatyčnuju napružanaść, jakaja ŭźnikła paśla raniejšych zajaŭ Donalda Trampa. Jon śćviardžaŭ, što Hrenłandyja pavinna być pad kantrolem ZŠA, kab nie dapuścić jaje patencyjnaha «zachopu» Kitajem abo Rasijaj. Hetyja słovy vyklikali kryzis u adnosinach z Danijaj i Hrenłandyjaj, ale ciapier aficyjna havorka idzie tolki pra supracoŭnictva, a nie pra źmienu statusu terytoryi.

Bieły dom paviedamlaje, što pieramovy iduć na vysokim uzroŭni i ŭ kanstruktyŭnym kirunku, ale detali nie raskryvajucca. Danija paćviardžaje, što dyjałoh viadziecca, i nie vyklučaje mahčymaści dadatkovych amierykanskich baz, ale padkreślivaje, što heta pavinna adbyvacca z ulikam jaje suvierenitetu.

Kiraŭnictva Hrenłandyi taksama adznačaje, što pieramovy ruchajucca ŭ lepšy bok. Miascovy premjer-ministr padkreśliŭ, što dyjałoh staŭ bolš spakojnym i kanstruktyŭnym u paraŭnańni z tym, jak jon vyhladaŭ raniej u publičnaj prastory. Adnak jon dadaŭ, što Hrenłandyja nie źbirajecca admaŭlacca ad svaich pravoŭ, «nie pradajecca» i budzie ŭdzielničać u lubych damoŭlenaściach tolki na asnovie pavahi.

Kamientary da artykuła