Pamior rasijski žurnalist Uładzimir Małčanaŭ

Va ŭzroście 75 hadoŭ ad ankałahičnaj chvaroby pamior rasijski žurnalist i televiadučy Uładzimir Małčanaŭ. U svoj čas jon byŭ kultavaj postaćciu savieckaha i rasijskaha telebačańnia, staŭ adnym ź simvałaŭ epochi harbačoŭskaj Pierabudovy.

Uładzimir Małčanaŭ

Uładzimir Małčanaŭ naradziŭsia ŭ 1950 hodzie ŭ siamji tvorčaj intelihiencyi. Jahony baćka byŭ kampazitaram, a maci — aktrysaj. Skončyŭ fiłałahičny fakultet MDU, pa adukacyi — linhvist, śpiecyjalist pa niderłandskaj movie. Dypłomnaja praca była pryśviečanaja hałandskaj litaratury.

Paśla ŭniviersiteta pracavaŭ u ahienctvie druku «Naviny», u tym liku byŭ karespandentam u Niderłandach. Mienavita žyćcio tam, pavodle słoŭ samoha Małčanava, mocna paŭpłyvała na jaho śvietapohlad i dapamahło pa-inšamu pahladzieć na savieckuju sistemu. U Niderłandach jon vyvučaŭ zachodniuju žurnalistyku i pracavaŭ pierakładčykam padčas aficyjnych vizitaŭ savieckich delehacyj.

Na telebačanńnie jon pryjšoŭ u 1987 hodzie i staŭ adnym ź jaho tahačasnych zorak. Małčanaŭ byŭ adnym ź viadučych asnoŭnaj savieckaj infarmacyjnaj prahramy «Vriemia», ale sapraŭdnuju słavu jamu pryniesła infarmacyjna-zabaŭlalnaja prahrama «Da i paśla poŭnačy». Jana kardynalna adroźnivałasia ad zastyłych savieckich pieradač: žyvaja mova, jeŭrapiejski styl, vostryja repartažy i zabaronienaja raniej muzyka. Małčanava nazyvali «samym elehantnym viadučym» savieckaha ekrana.

U 1991 hodzie paśla padziej 13 studzienia ŭ Vilni Małčanaŭ admoviŭsia vieści prahramu «Vriemia», bo kiraŭnictva patrabavała nie pakazvać materyjały pra situacyju ŭ Litvie. U znak pratestu jon taksama vyjšaŭ z KPSS.

Paźniej jon pracavaŭ na roznych rasijskich telekanałach, vioŭ kulturnyja i hramadska-palityčnyja prahramy, stvaraŭ dakumientalnyja filmy i radyjopieradačy. Asablivuju ŭvahu jon nadavaŭ temam kultury, historyi i čałaviečych losaŭ.

Da kanca žyćcia Małčanaŭ byŭ viadomy siarod inšaha svaim nieprymirymym staŭleńniem da savieckaha ładu:

«Z časam ja zrazumieŭ, što pamiž fašyzmam, nacyzmam i stalinizmam staić absalutny znak roŭnaści. I nichto, nivodzin prezident mianie ŭ advarotnym nie pierakanaje. Stalinizm navat strašniejšy chacia b tamu, što nivodzin uładar nie źniščyŭ stolki svajho naroda, kolki heta zrabiŭ Stalin…»

Kamientary da artykuła