Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty
Biełarus Uładzimir Fiacisaŭ pryjšoŭ na rasijskaje šou «Davaj paženimsia» pantavacca šykoŭnym žyćciom. Ale sieŭ u łužynu: vyśvietliłasia, što «miljanier» miljonaŭ nie maje, a z byłoj žonkaj sudzicca za alimienty — i pierakonvaje sud, što zarablaje 750 rubloŭ štomiesiac.
Uładzimir Fiacisaŭ. Skrynšot videa ŭ jaho instahramie
U svaich sacsietkach Uładzimir Fiacisaŭ demanstruje zaharadny dom i lubimuju BMW, publikuje videa z tusovak z podpisam: «Chałaściak. Bieź dziaciej. Vandruju. Kajfuju».
Tam ža možna pabačyć videa «Parady miljaniera». Da Uładzimira padyšoŭ błohier, jaki paprasiŭ taho raspavieści pra jaho pośpiech. Biznesmien trymaŭsia maksimalna pafasna: kazaŭ, što skončyŭ Vajskovuju akademiju, ale śfieru, u jakoj pracuje ciapier, nazvać admaŭlaŭsia. Maŭlaŭ, vielmi šmat napramkaŭ.
Kali chłopiec kaža: «9 z 10 biznesaŭ zakryvajucca, jak dumajecie, što jany robiać nie tak?», Uładzimir dadaje:
— U mianie taksama 9 z 10 zakryvalisia, ale adzin vystraliŭ tak, što ja ciapier kajfuju ad žyćcia.
Uładzimir kazaŭ, što pravilny biznes pavinien pracavać na kredytnych hrošach. I raiŭ vybiracca ź nikčemnaha asiarodździa.
Uładzimir na ANT. U sacsietkach žartujuć z taho, što miljanier chodzić na zapisy šou ŭ adnym i tym ža džempiery
Sioleta jon užo chadziŭ na šou ANT «Jašče nie viečar», dzie vychvalaŭsia tym, jak Vajskovaja akademija dapamahła sfarmiravać jamu mocny stryžań.
Fota z tyktoka Uładzimira
A ciapier voś vyrašyŭ pajści šukać sabie «parodzistuju pryhažuniu» na rasijskaje telešou «Davaj paženimsia». Vypusk ź im nazvali «Zamožny biełarus».
U vizitcy pra Fiacisava raspaviali: 44 hady, žyvie ŭ Minsku, źjaŭlajecca hienieralnym dyrektaram kampanii, jakaja zajmajecca kamiercyjnaj nieruchomaściu.
Asobna dadajecca, što jon nie biare na pracu žančyn z zališniaj vahoj. Nie tamu, što jany drennyja śpiecyjalistki, a tamu, što psujuć imidž kampanii.
Huhł nie viedaje staličnaj firmy z takim hienieralnym dyrektaram. Zatoje isnuje indyvidualny pradprymalnik Uładzimir Fiacisaŭ, jaki zajmajecca zdačaj u najm ułasnaj i arandavanaj nieruchomaści. Raniej jon ža zajmaŭsia handlem aŭtamabilami i matacykłami, ich techničnym absłuhoŭvańniem i ramontam.
Skrynšot šou «Davaj paženimsia»
Pra Uładzimira na šou taksama raspaviali, što śpić jon tolki na premijalnych matracach, nosić vyklučna brendavyja kaściumy, a jašče nie ŭjaŭlaje žyćcia biez łobstaraŭ. Maryć daśledavać hłybini mora na ŭłasnym batyskafie.
Na «Davaj paženimsia» pryjšoŭ pa «parodzistuju pryhažuniu vysakarodnaj prafiesii» (abaviazkova z pryhožymi formami, puchłymi hubami i doŭhimi hustymi vałasami). Adznačaŭ, što jamu dakładna nie pasuje bodzibiłdarša, amatarka psichałahičnych treninhaŭ i pradaŭščyca nieruchomaści ŭ Dubai.
Pra siabie Uładzimir raspavioŭ, što sam ź siamji vajskoŭcaŭ, tamu spačatku i budavaŭ karjeru ŭ hetaj śfiery. Ale pabačyŭ na prykładzie inšych chłopcaŭ, što možna zarablać zusim inšyja hrošy.
Žanaty byŭ dvojčy, abiedźvie žonki naradzili ad jaho pa synu. Uładzimir raspaviadaŭ, što zabiaśpiečvaŭ im šykoŭnaje žyćcio.
Viadučyja začytali, jakim pasaham pachvaliŭsia Uładzimir u ankiecie: novy kabryjalet, dom i vosiem kaściumaŭ ad darahich brendaŭ. Plus niejkaja kamiercyjnaja nieruchomaść — ale potym jon admoviŭsia adkazać, kolki ž jaje maje (nie paličyŭ, u adroźnieńnie ad kaściumaŭ), i na ŭsie ŭdakładnieńni kazaŭ: «Dastatkova!».
U pracesie šou Uładzimir zajaŭlaŭ: «U mianie šmatmiljonny biznes, ja pracuju maksimum siem hadzin na dzień i try dni na tydzień».
Ale jak vyśvietliłasia, usio nie tak radasna ŭ žyćci bahacieja. Redaktary pieradačy znajšli druhuju žonku Uładzimira — taja admoviłasia pryjechać na šou, ale napisała list.
Z druhoj žonkaj Uładzimir paznajomiŭsia ŭ 2017 hodzie — i z bahaćcia tady była adnapakajoŭka ŭ Minsku i stareńki Land Rover. A bonusam — niemaleńkija daŭhi.
U 2020 hodzie para pačała budavać sumiesny biznes, na jaki brali kredyty ŭ banku, i šmat pracavali, kab pa ich vypłačvać. Pa ich raźlikach, na narmalny dachod jany pavinny byli vyjści ŭ 2025 hodzie.
U 2021‑m Uładzimir i Taćciana pabralisia šlubam, u 2024‑m naradziŭsia syn. Usie hetyja hady, śćviardžaje žančyna, siamja žyła vielmi ścipła: ježu nabyvała pa akcyjach, a vałasy žoncy farbavała susiedka. Usie dachody sychodzili na kredyty. Kab u čarhovy raz zakryć finansavyja pytańni, Taćciana navat pradała amal usie svaje załatyja ŭpryhožvańni.
U chutkim časie Uładzimir, pa słovach byłoj žonki, pačaŭ źbivać jaje. A kali biznes narešcie pačaŭ prynosić dachody, zdradžvaŭ.
Letaś para razyšłasia. Taćciana raspaviała, što Uładzimir vyrašyŭ pakinuć sabie navat dziciačy vazočak i aŭtakresła. Ciapier jany sudziacca za alimienty. Pry hetym u sudzie Uładzimir nie pazicyjanuje siabie jak miljaniera, a zusim naadvarot — zajaviŭ, što zarablaje 750 rubloŭ štomiesiac.
Začytali i kopiju padatkovaj dekłaracyi, jakuju Uładzimir dasyłaŭ u sud, kab źmienšyć pamier alimientaŭ. Zhodna ź joj, dachod jaho IP za hod skład 249 536 rubloŭ. Kolki ź ich prybytku, nie ahučvałasia. Uładzimir ža staŭ pierakonvać, što havorka idzie pra kvartał.
Kaniešnie, možna było b padumać, što heta redaktary «Davaj paženimsia» sami prydumali list, kab dadać dramatyzmu. Ale nie: u sacyjalnych sietkach źjaviłasia taja samaja Taćciana — žonka numar 2 — i paćvierdziła: usio, što prahučała ŭ kadry, praŭda.
Dadała, što były muž zabraŭ navat jaje hrošy i mašynu — ale daŭhoŭ u jaho i siońnia chapaje. Jana ž raspaviała, što ŭ minułym Uładzimir paśpieŭ papracavać u milicyi.
Uładzimir hanarycca svaim vajskovym minułym
Tym časam kamientatary ŭ sacsietkach žartujuć z taho, što «miljanier» na zapis usich televizijnych šou chodzić u adnym i tym ža błakitnym džempiery.
Ci znajšoŭ «miljanier» niaviestu na šou? Nie. Adna z žančyn skazała, što nie ličyć Uładzimira mužčynam, i dała zrazumieć, što jon joj vielmi niepryjemny. Ź dźviuch inšych jon sam admoviŭsia vybirać (z ulikam taho, što adna ź ich prapanavała jamu prajści palihraf, kab zrazumieć, dzie biełarus chłusić).