U Biełarusi stvaryli virtualnaha pacyjenta dla treniroŭki miedykaŭ
U Biełarusi stvaryli virtualnaha pacyjenta «Miedekzam», jaki dapamahaje vučyć studentaŭ miedycynskich univiersitetaŭ i praviarać padrychtoŭku daktaroŭ. Prajekt raspracavali śpiecyjalisty Viciebskaha dziaržaŭnaha miedycynskaha ŭniviersiteta razam z kampanijaj — rezidentam Parka vysokich technałohij. Raspracoŭku pakazali na vystavie «Achova zdaroŭja Biełarusi» ŭ Minsku, piša BiełTA.
Fota: BiełTA
Jak adznačyli raspracoŭščyki, budučym daktaram užo niedastatkova tolki praktyki ŭ balnicach. Dla jakasnaha navučańnia patrebnyja śpiecyjalnyja simulacyi, dzie možna adpracoŭvać dyjahnostyku i lačeńnie biez ryzyki dla realnych pacyjentaŭ. Zamiežnyja prahramy nie zaŭsiody padychodziać biełaruskim miedykam, bo ich scenaryi i schiemy lačeńnia časta nie adpaviadajuć patrabavańniam Ministerstva achovy zdaroŭja Biełarusi.
Tamu było vyrašana stvaryć ułasnaha virtualnaha pacyjenta. Prahrama dazvalaje dadavać novyja scenaryi roznaj składanaści. Zaraz užo jość 12 takich scenaryjaŭ, i ich kolkaść płanujuć pavialičvać.
Asabliva karysnaja sistema dla analizu pamyłak paśla prachodžańnia zadańniaŭ. Jana praviaraje, ci pravilna budučy doktar pravodziŭ ahlad, dyjahnostyku i lačeńnie.
Taksama «Miedekzam» možna vykarystoŭvać jak ekzamienacyjnuju płatformu dla acenki hatoŭnaści daktaroŭ-internaŭ da realnaj miedycynskaj pracy. Pieršy taki piłotny ekzamien płanujuć pravieści ŭžo ŭ červieni ŭ Viciebskim dziaržaŭnym miedycynskim univiersitecie.