Novy hieroj u Rasii: Dzima ź Išyma vyjšaŭ z bara, a pračnuŭsia za 300 km — u Ciumieni, u vahonie z vuhalem
«Ja adpačyvaŭ u Išymie ŭ miascovym bary. Ranicaj mnie treba było iści na rabotu, i ja jak samy adkazny čałaviek pryniaŭ rašeńnie iści dadomu pieššu, kab, tak by mović, pravietrycca».
Dźmitryj Klimaŭ. Skryn videa: this__man007 / Instagram
Historyja, jakaja bolš nahadvaje siužet ekstremalnaj kamiedyi, zrabiła žychara rasijskaha horada Išym Dźmitryja Klimava sapraŭdnaj zorkaj internetu.
Usio pačałosia z taho, što ŭ sacsietkach źjavilisia videapaviedamleńni-kružočki, jakija Dzima zapisvaŭ svajmu siabru Saniu. Na kadrach bačny małady čałaviek, tvar jakoha całkam pakryty čornym vuhalnym pyłam. Znachodziačysia ŭ stanie mocnaha ałkaholnaha apjanieńnia, Dzima sprabuje rastłumačyć situacyju:
«Sania, ja, vidać, nie vyjdu na rabotu. Šeść hadzin ranicy. A ja kudyści jedu ŭ vahonie na vuhali. Ja nie viedaju, kudy ja jedu i kali prybudu».
U nastupnych videa Dzima paviedamiŭ Sani, što znachodzicca ŭ Ciumieni, i jašče raz skazaŭ, što nie zmoža vyjści na pracu.
«Ja zusim nie razumieju, jak u vahonie z vuhalem ja pryjechaŭ u Ciumień. Čamu? A kali b ja pryjechaŭ nie ŭ Ciumień, a ŭ jakuju-niebudź Abchaziju? I što b ja rabiŭ?» — zaŭvažaje małady čałaviek.
Pamiž Išymam i Ciumieńniu — amal 300 kiłamietraŭ, jakija chłopiec pieraadoleŭ u jakaści «zajca» siarod paliva.
Paźniej, kali Dźmitryj viarnuŭsia dadomu, jon raspavioŭ padrabiaznaści hetaj niezvyčajnaj nočy. Pavodle jaho słoŭ, usio adbyłosia ŭ noč z 8 na 9 maja, kali ŭ Rasii śviatkujuć Dzień Pieramohi.
«Ja adpačyvaŭ u Išymie ŭ miascovym bary. Ranicaj mnie treba było iści na rabotu, i ja jak samy adkazny čałaviek pryniaŭ rašeńnie iści dadomu pieššu, kab, tak by mović, pravietrycca», — napisaŭ Klimaŭ u svaim Instagram.
Adnak płan «pravietrycca» pajšoŭ nie pavodle scenaryja. Dzima ščyra pryznajecca, što nie pamiataje, jak trapiŭ na čyhunku: «Jakim čynam ja tam apynuŭsia, viadoma tolki kaktejlu «Tekiła Bum». Akramia telefona, u mianie z saboj ničoha nie apynułasia».
Videa Dźmitryja imhnienna stali virusnymi.
«Ihar, jaki buchi idzie dachaty, paśla hetaha hieroja niervova kuryć zboku», — zaŭvažajuć karystalniki.
Samim ža «hierojem» zacikavilisia pravaachoŭnyja orhany. Transpartnaja palicyja za parušeńnie pravił pavodzin na čyhunačnym transparcie pryznačyła padarožniku štraf sumaj 2000 rasijskich rubloŭ — heta kala 26 dalaraŭ.