Новы герой у Расіі: Дзіма з Ішыма выйшаў з бара, а прачнуўся за 300 км — у Цюмені, у вагоне з вугалем
«Я адпачываў у Ішыме ў мясцовым бары. Раніцай мне трэба было ісці на работу, і я як самы адказны чалавек прыняў рашэнне ісці дадому пешшу, каб, так бы мовіць, праветрыцца».
Дзмітрый Клімаў. Скрын відэа: this__man007 / Instagram
Гісторыя, якая больш нагадвае сюжэт экстрэмальнай камедыі, зрабіла жыхара расійскага горада Ішым Дзмітрыя Клімава сапраўднай зоркай інтэрнэту.
Усё пачалося з таго, што ў сацсетках з’явіліся відэапаведамленні-кружочкі, якія Дзіма запісваў свайму сябру Саню. На кадрах бачны малады чалавек, твар якога цалкам пакрыты чорным вугальным пылам. Знаходзячыся ў стане моцнага алкагольнага ап’янення, Дзіма спрабуе растлумачыць сітуацыю:
«Саня, я, відаць, не выйду на работу. Шэсць гадзін раніцы. А я кудысьці еду ў вагоне на вугалі. Я не ведаю, куды я еду і калі прыбуду».
У наступных відэа Дзіма паведаміў Сані, што знаходзіцца ў Цюмені, і яшчэ раз сказаў, што не зможа выйсці на працу.
«Я зусім не разумею, як у вагоне з вугалем я прыехаў у Цюмень. Чаму? А калі б я прыехаў не ў Цюмень, а ў якую-небудзь Абхазію? І што б я рабіў?» — заўважае малады чалавек.
Паміж Ішымам і Цюменню — амаль 300 кіламетраў, якія хлопец пераадолеў у якасці «зайца» сярод паліва.
Пазней, калі Дзмітрый вярнуўся дадому, ён распавёў падрабязнасці гэтай незвычайнай ночы. Паводле яго слоў, усё адбылося ў ноч з 8 на 9 мая, калі ў Расіі святкуюць Дзень Перамогі.
«Я адпачываў у Ішыме ў мясцовым бары. Раніцай мне трэба было ісці на работу, і я як самы адказны чалавек прыняў рашэнне ісці дадому пешшу, каб, так бы мовіць, праветрыцца», — напісаў Клімаў у сваім Instagram.
Аднак план «праветрыцца» пайшоў не паводле сцэнарыя. Дзіма шчыра прызнаецца, што не памятае, як трапіў на чыгунку: «Якім чынам я там апынуўся, вядома толькі кактэйлю «Тэкіла Бум». Акрамя тэлефона, у мяне з сабой нічога не апынулася».
Відэа Дзмітрыя імгненна сталі віруснымі.
«Ігар, які бухі ідзе дахаты, пасля гэтага героя нервова курыць збоку», — заўважаюць карыстальнікі.
Самім жа «героем» зацікавіліся праваахоўныя органы. Транспартная паліцыя за парушэнне правіл паводзін на чыгуначным транспарце прызначыла падарожніку штраф сумай 2000 расійскіх рублёў — гэта каля 26 даляраў.