Prezident Finlandyi: ZŠA nie mohuć sabie dazvolić vyjści z NATA, što b ni havaryŭ Tramp
Prezident Finlandyi Alaksandr Stub zajaviŭ, što ZŠA nie vyjduć z NATA, niahledziačy na žorstkuju rytoryku Donalda Trampa. Na jaho dumku, hałoŭnaja pryčyna hetaha — najaŭnaść u Rasii jadziernaj zbroi, piša Bloomberg.
Alaksandr Stub. Fota: UNIAN
Vystupajučy na litoŭska-finskim biznes-forumie ŭ Vilni, Alaksandr Stub adznačyŭ, što Vašynhtonu važna zachoŭvać vajskovuju prysutnaść u Jeŭropie, bo mienavita tut, jak jon ličyć, znachodzicca asnoŭnaja pahroza dla ZŠA. Pavodle jaho słoŭ, značnaja častka rasijskaha jadziernaha arsienału raźmieščana na Kolskim paŭvostravie niedaloka ad finskaj miažy.
Finski prezident taksama zajaviŭ, što hetaja zbroja nibyta nacelenaja na bujnyja amierykanskija harady, u tym liku Ńju-Jork, Vašynhton i Łos-Andželes.
Jon padkreśliŭ, što pamiž palityčnaj rytorykaj i realnymi dziejańniami isnuje vialikaja roźnica, tamu ZŠA, na jaho dumku, zastanucca ŭ aljansie.
Prezident Litvy Hitanas Naŭsieda ŭ svaju čarhu zaklikaŭ krainy NATA zachoŭvać adzinstva i nazvaŭ aljans najmacniejšaj vajskovaj arhanizacyjaj u historyi.
Tym časam Bloomberg paviedamlaje, što ZŠA niadaŭna admianili raniej zapłanavanaje pierakidańnie kala čatyroch tysiač amierykanskich vajskoŭcaŭ u Polšču. Raniej Donald Tramp taksama zajaŭlaŭ pra mahčymaść skaračeńnia amierykanskaj vajskovaj prysutnaści ŭ Jeŭropie i krytykavaŭ sajuźnikaŭ za niedastatkovyja vydatki na abaronu.
Čytajcie taksama:
«Čas razmaŭlać z Rasijaj». Prezident Finlandyi zaklikaŭ Jeŭropu pačać pieramovy z Maskvoj
Voś jak jeŭrapiejcy i Kanada buduć dziejničać, kali ZŠA vyjduć z NATA