Najvyšejšy vajskovy čynoŭnik ZŠA prybudzie ŭ Polšču paśla raptoŭnaha rašeńnia nie razhortvać bryhadu
Vizit hienierała Kiejna ŭ Varšavu zapłanavany na sieradu i vyklikaje vialikuju cikavaść u Polščy.
Fota: Tom Williams/CQ-Roll Call, Inc via Getty Images
Na nastupnym tydni ŭ Varšavu prybudzie hienierał Den Kiejn, staršynia Abjadnanaha kamiteta načalnikaŭ štaboŭ Uzbrojenych sił ZŠA, kab abmierkavać rašeńnie ab admovie ad nakiravańnia amierykanskaj braniatankavaj bryhady ŭ Polšču, paviedamlaje RMF 24.
Vizit hienierała Kiejna ŭ Varšavu zapłanavany na sieradu i vyklikaje vialikuju cikavaść u Polščy. Jaho pryjezd adbyvajecca ŭ momant, kali vajskovyja stasunki pamiž Varšavaj i Vašynhtonam apynulisia ŭ centry ŭvahi paśla raptoŭnaha abviaščeńnia ZŠA pra admovu ad nakiravańnia čatyroch tysiač vajskoŭcaŭ u Polšču.
Kamandujučy amierykanskimi suchaputnymi vojskami hienierał Krystafier ŁaNievie padkreśliŭ, što z ulikam atrymanych im ukazańniaŭ skasavańnie nakiravańnia braniatankavaj bryhady ŭ Polšču «było najbolš razumnym varyjantam».
Hetaja infarmacyja vyklikała šmatlikija pytańni adnosna budučyni prysutnaści amierykanskich vojskaŭ u Polščy i biaśpieki ŭsiaho rehijona Centralna-Uschodniaj Jeŭropy.
Vice-premjer-ministr i ministr nacyjanalnaj abarony Uładzisłaŭ Kasiniak-Kamyš zapłanavaŭ sustreču z hienierałam Kiejnam, padčas jakoj pavinny być abmierkavanyja dalejšyja kroki i mahčymaści vajskovaha supracoŭnictva.
Adnačasova z paniadziełka ŭ Złučanych Štatach buduć znachodzicca namieśniki ministra abarony — Cezaryčj Tomčyk i Pavieł Zaleŭski. Ich zadačaj budzie praviadzieńnie pieramoŭ na mižnarodnym uzroŭni i pradstaŭleńnie polskaj pazicyi pa hetym pytańni.
Jak vynikaje z damoŭlenaściaŭ, da hetych zachadaŭ dałučycca taksama MZS Polščy, jakoje budzie pravodzić ułasnyja dypłamatyčnyja inicyjatyvy.
ŁaNievie zajaviŭ u Pałacie pradstaŭnikoŭ ZŠA, što nie viedaje, ci była Polšča prainfarmavanaja pra prypynieńnie zapłanavanaj pierakidki braniatankavaj bryhady. Jon taksama nie zmoh adkazać na pytańnie, ci isnujuć płany zamieny bryhady ŭ Polščy.
Vydańnie Politico paviedamiła, što čynoŭniki Pientahonu byli ździŭlenyja hetym rašeńniem.