Prezident Łatvii daručyŭ sfarmavać urad apazicyjanieru

Prezident Łatvii Edhars Rynkievičs daručyŭ pradstaŭniku apazicyi Andrysu Kułbierhsu pasprabavać sfarmavać novy ŭrad.

Andrys Kułbierhs. Fota: facebook.com/andris.kulbergs

Ciapier Andrys Kułbierhs pavinien pravieści pieramovy z partyjami i prapanavać skład urada, jaki paśla jašče musić zaćvierdzić parłamient krainy. Prezident Łatvii ličyć, što chutkaje farmiravańnie novaha ŭrada krainy lepš, čym situacyja, kali ciapierašni kabiniet praciahvaŭ by pracavać u statusie vykanaŭcy abaviazkaŭ da novych vybaraŭ.

Asobna padkreślivajecca, što praces treba pravieści ŭ ścisłyja terminy, bo da parłamienckich vybaraŭ zastałosia niašmat času. Kułbierhs pavinien užo da 25 maja pradstavić spravazdaču ab chodzie pieramoŭ, mahčymym składzie kaalicyi i asnoŭnych napramkach pracy ŭrada.

Partyja «Abjadnany śpis», jakuju jon pradstaŭlaje, zaraz źjaŭlajecca najbujniejšaj apazicyjnaj siłaj u parłamiencie, što i paŭpłyvała na rašeńnie prezidenta.

Sam Kułbierhs pryjšoŭ u palityku adnosna niadaŭna — u 2022 hodzie, da hetaha jon byŭ viadomy jak biznesmien i ekśpiert u aŭtamabilnaj śfiery. U parłamiencie jon aktyŭna ŭdzielničaje ŭ dyskusijach i zajmaŭsia rasśledavańniem prablem, źviazanych z bujnymi infrastrukturnymi prajektami.

Papiaredni ŭrad na čale z Evikaj Silinia padaŭ u adstaŭku paśla raspadu kaalicyi. Heta adbyłosia na fonie palityčnych sprečak, u tym liku vakoł situacyi z adstaŭkaj ministra abarony, što ŭ vyniku pryviało da kryzisu ŭłady.

Novy ŭrad pavinien pracavać da čarhovych parłamienckich vybaraŭ, jakija zapłanavanyja na vosień 2026 hoda.

Kamientary da artykuła