Miortvy kit, znojdzieny kala ŭźbiarežža Danii — sapraŭdy šmatpakutny Cimi
Harbaty kit, znojdzieny miortvym kala dackaha vostrava Ancholt, — mienavita taja žyviolina, jakaja raniej sieła na miel kala bierahoŭ niamieckich Šleźvih-Halštejna i Mieklenburha-Piaredniaj Pamieranii. Heta paćvierdziła Dackaje ahienctva pa achovie navakolnaha asiarodździa, piša Bild.
Kančatkovuju ŭpeŭnienaść 16 maja daŭ znojdzieny na kicie trekier. Pryłada adsočvańnia ciapier znachodzicca ŭ rasparadžeńni dackaha ŭrada. Raniej paviedamlałasia, što ŭ miortvaha kita trekiera vyjaŭlena nie było.
Kit Cimi na praciahu niekalkich tydniaŭ pryciahvaŭ uvahu ŭsioj Hiermanii:
«Kali paćvierdzicca, što heta toj samy kit, los jakoha ŭ apošnija tydni ŭsich chvalavaŭ, ja budu adčuvać tolki adno — smutak», — raniej zajaviŭ ekśpiert Fabijan Ryter, staršynia NKA pa abaronie marskich žyvioł M.E.E.R. e.V.
Śmierć žyvioliny, pavodle jaho słoŭ, była pradkazalnaj. U intervju Bild daśledčyk kitoŭ tłumačyć:
«Ja nieadnarazova kazaŭ, što praz svoj ahulny stan kit jašče da transpartavańnia nie byŭ kandydatam dla padobnych mier. Jaho ahulny stan, vidać, i pryvioŭ da taho, što adbyłosia toje, čaho aścierahalisia».
Ryter znoŭ raskrytykavaŭ ratavalnuju apieracyju. Jon zaŭsiody vystupaŭ za toje, kab pakinuć kita na piasčanaj mieli i dać jamu «pamierci pryrodnym čynam»: «Navat kali dla mnohich ludziej heta było nievynosna».
Aceńvać, ci byŭ Cimi vypuščany zanadta rana abo ŭ nieadpaviednym miescy padčas transpartavańnia, ekśpiert nie biarecca. Adnak jon adznačyŭ:
«Heta dakładna było miesca ź vielmi intensiŭnym sudnachodstvam, i šlach dla kita nazad u jaho pryrodnaje asiarodździe pražyvańnia ŭsio jašče byŭ vielmi i vielmi doŭhim».
Čytajcie taksama:
U Danii znajšli miortvaha kita. Heta moža być vyratavany dva tydni tamu kala bierahoŭ Hiermanii Cimi
Harbataha kita Cimi narešcie vypuścili ŭ Paŭnočnaje mora. Ale vyžyć jamu budzie składana