Vialikaja ataka dronaŭ na Maskvu i vobłaść. Jość achviary, haryć naftanaliŭnaja stancyja ŭ pryharadzie
U noč na 17 maja Maskoŭski rehijon zaznaŭ adnu z samych masiravanych atak bieśpiłotnikaŭ.
Na naftaliŭnaj stancyi kala Durykina harać dva reziervuary. Skrynšot ź videa ź miascovych čataŭ
Upieršyniu ŭkrainskija bieśpiłotniki zdoleli prabić koła abarony vakoł rasijskaj stalicy. Drony biespaśpiachova sprabavali prabicca da naftapierapracoŭčaha zavoda ŭ Kapotni na paŭdniovym uschodzie Maskvy (apošniaje videa tut nižej), ale parazić udałosia tolki Soniečnahorskuju naftanaliŭnuju stancyju ŭ Durykinie na paŭnočny zachad ad horada (pieršyja videa).
Tam harać dva reziervuary. Słupy čornaha dymu bačnyja z usioj Maskvy.
Niekatoryja bieśpiłotniki ŭdaryli pa pramysłovych abjektach u Padmaskoŭi. Častka padaŭlenych REB bieśpiłotnikaŭ urezałasia ŭ žyłyja damy.
Raspaŭsiud infarmacyi pra ŭdary ŭ Rasii abmiežavany.
Pavodle źviestak rasijskich uładaŭ, u niepasrednaj blizkaści ad stalicy za sutki było źbita bolš za 120 bieśpiłotnikaŭ. Pra kolkaść papadańniaŭ rasijskija ŭłady nie paviedamlajuć.
U vyniku načnoha vybuchu zaharełasia Soniečnahorskaja naliŭnaja stancyja. Hety bujny abjekt uvachodzić u sistemu mahistralnych naftaprovadaŭ vakoł Maskvy i vykarystoŭvajecca dla zachoŭvańnia i adhruzki bienzinu i dyzielnaha paliva.
Pažar zafiksavany taksama ŭ technaparku «Ełma» (Zielenahrad). Tam pracujuć bolš za 150 rezidentaŭ, jakija śpiecyjalizujucca na vytvorčaści mikraelektroniki, aptyčnaj techniki i navukovych raspracoŭkach, piša ASTRA.
Na hety čas viadoma pra troch zahinułych u Padmaskoŭi. U Chimkach dron trapiŭ u pryvatny dom — zahinuła žančyna. U Myciščach abłomki BPŁA zabili dvuch mužčyn na budoŭli.
U Krasnahorsku i Istry bieśpiłotniki paškodzili šmatkvaternyja damy, a ŭ pasiołku Ahraharadok pad udar trapili šeść pryvatnych damoŭ, dzie paranienyja čatyry čałavieki.
U samoj Maskvie paranienyja najmienš 12 čałaviek.
Pavodle zajavy Minabarony RF, ahułam SPA źniščyli 556 ukrainskich BPŁA. Drony byli źbityja nad terytoryjami Biełharadskaj, Kałužskaj, Kurskaj, Arłoŭskaj, Branskaj, Varoniežskaj, Tulskaj, Smalenskaj, Pskoŭskaj, Lipieckaj, Ćviarskoj, Rastoŭskaj abłaściej, Krasnadarskaha kraju, Maskoŭskaha rehijonu, anieksavanaha Kryma, akvatoryjami Čornaha i Azoŭskaha moraŭ.
Dahetul Maskva zaznavała tolki vypadkovaj škody, a ŭzrovień padtrymki vajny tam byŭ najvyšejšy — bo na front išli pieravažna mužčyny ź biednych rehijonaŭ Rasii.