Kolki arendnaha žylla ciapier budujecca ŭ Minsku? Adzin z damoŭ — dla siłavikoŭ
U Minsku budujuć šeść arendnych žyłych damoŭ na roznych placoŭkach. Pra heta ŭ efiry prahramy «Havoryć i pakazvaje Minsk» raskazała staršynia kamiteta budaŭnictva i inviestycyj Minharvykankama Iryna Hontarava.
Fota: LookByMedia
Finansujecca budaŭnictva takoha žylla pa niekalkich kirunkach.
«Pieršaja krynica — heta srodki, jakija pastupajuć ad užo pabudavanaha arendnaha žylla, tak zvanaje haradskoje arendnaje žyllo. Jano raźmierkoŭvajecca siarod čarhavikoŭ, jakija stajać na ŭliku tych, chto maje patrebu ŭ palapšeńni žyllovych umoŭ, pa administracyjach rajonaŭ. Druhaja krynica — za košt respublikanskaha biudžetu dla supracoŭnikaŭ siłavych struktur. Treciaja — za ŭłasnyja srodki pradpryjemstvaŭ dla ich rabotnikaŭ», — patłumačyła Hontarava.
Adzin z damoŭ uzvodzicca ŭ miežach vulic Karvata — Hieałahičnaj — Suviazistaŭ. Jaho budujuć za košt srodkaŭ pradpryjemstvaŭ i pryznačany jon dla ich supracoŭnikaŭ. Čatyry arendnyja damy budujucca ŭ rajonie vulic M. Łyńkova, P. Hlebki i prajezda Masiukoŭščyna. Hetyja abjekty taksama ŭzvodziacca z udziełam pradpryjemstvaŭ i horada, tudy zasielać rabotnikaŭ i hramadzian, jakija stajać u čarzie.
Jašče adzin arendny dom budujecca ŭ Łošycy za košt respublikanskaha biudžetu i pryznačany dla supracoŭnikaŭ siłavych struktur.
Asobny dom u hetym ža žyłym rajonie ŭzvodzicca za košt haradskoha śpiecrachunku.
«Abjomy budaŭnictva arendnaha žylla štohod pavialičvajucca, hetaja tendencyja z ulikam popytu budzie praciahvacca», — adznačyła Hontarava.