U Vienhryi zajac skoknuŭ samakatčyku ŭ tvar i źbiŭ jaho na ziamlu
Niezvyčajnaje darožna-transpartnaje zdareńnie adbyłosia niepadalok ad Budapiešta: tam dziki zajac padčas vysokaha skačka litaralna źbiŭ mužčynu z elektrasamakata. Pra zdareńnie paviedamiŭ vienhierski telekanał Tények.
Paciarpieły Daniel Kovač raspavioŭ, što jechaŭ z chutkaściu 35 kiłamietraŭ za hadzinu. Sutyknieńnie adbyłosia absalutna niečakana, kali žyvioła ŭ skačku apynułasia na ŭzroŭni jaho hałavy.
Zajac ulacieŭ kiroŭcu prosta ŭ tvar, paśla čaho mužčyna straciŭ kiravańnie i zvaliŭsia na asfalt.
Mužčyna pryznaŭsia, što byŭ mocna ździŭleny samim faktam taho, što takoje naohuł mahčyma.
Kadry ź videarehistratara zafiksavali, što paśla sutyknieńnia žyvioła adrazu ž źbiehła ŭ pole.
Sam kiroŭca atrymaŭ tolki ŭdar — ad ciažkich traŭm jaho vyratavali šlem i achoŭnaja ekipiroŭka.
U Palaŭničaj pałacie Vienhryi patłumačyli, što ŭ stanie stresu zajcy zdolnyja razhaniacca da 70 kiłamietraŭ za hadzinu i skakać u vyšyniu da piaci mietraŭ. U hetym vypadku źvier prosta nie zrazumieŭ, adkul idzie pahroza, razhubiŭsia i skoknuŭ na abjekt, što ruchaŭsia jamu nasustrač.