Śpikier Kaardynacyjnaj rady Arciom Bruchan pahaliŭsia nałysa, bo jaŭka na vybarach skłała mienš za 5000 čałaviek
Arciom Bruchan pajšoŭ u zakład sa svaim siabram nakont prychodu na vybarach u Kaardynacyjnuju radu.
«Ja byŭ aptymistam, ja ŭ heta śviata vieryŭ. Ale prychod byŭ mienšym», — prakamientavaŭ Arciom padčas strymu z Paŭłam Łatuškam na jutub-kanale apošniaha.
Novy imidž Arcioma Bruchana. Fota: instahram Kaalicyi Łatuški i Ruch «Za Svabodu»
U kamientary «Našaj Nivie» Arciom dadaŭ, što vałasoŭ jamu nie škada — «adrastuć». Da taho ž, heta nie pieršaja jaho fryzura amal «pad nul».
«U mianie była fryzura try milimietry, kali ja byŭ futbolnym fanatam», — raspavioŭ namieśnik kiraŭnika Narodnaha antykryzisnaha ŭpraŭleńnia.
Jak viadoma, Bruchan byŭ fanatam bresckaha «Dynama».
Na strymie z Paŭłam Łatuškam
Dla palityka było važna strymać abiacańnie, da taho žonka Arcioma padtrymała jaho novy vobraz. Mienavita jana stała natchnialnicaj dla videa z proma vybaraŭ. Jano było zroblena pa śladach papularnaha ciapier trendu, dzie ludzi razyhryvajuć roznyja žyćciovyja scenary na miažy ŭ styli ŭryŭka z trylera «Viaršynia», dzie akcior Teran Edžartan u roli psicha Bena tančyć pad trek «Go» hrupy The Chemical Brothers.
Toj samy trend u vykanańni Arcioma Bruchana
Pa vynikach hałasavańnia Kaalicyja Paŭła Łatuški i Ruchu «Za svabodu» nabrała najbolšuju kolkaść hałasoŭ — 42%. Ahułam u vybarach u Kaardynacyjnuju radu ŭziali ŭdzieł 2 113 čałaviek.