Papularny trevieł-błohier z Polščy naviedaŭ Biełaruś. Takich cen i kolkaści kamier jon nie čakaŭ
Polski błohier z amal 600 tysiačami padpisčykaŭ u jutubie naviedaŭ Biełaruś. Voś što ździviła palaka.
Fota tut i dalej: skrynšoty ź videa na jutub-kanale «Kamil — In Travel»
Hutarka na miažy i dva telefony
Pra svajo padarožža błohier Kamił Cichocki vypuściŭ dva videa na jutub-kanale «Kamil — In Travel». Heta jaho pieršaja pajezdka ŭ Biełaruś.
Hałoŭnaj pieraškodaj jon nazvaŭ doŭhi čas prachodžańnia miažy.
Z Varšavy jon dabiraŭsia aŭtobusam, a na miažy daviedaŭsia, što, padsieŭšy ŭ lehkavoje aŭto, prajści kantrol možna značna chutčej, tamu za 20 jeŭra znajšoŭ achvotnaha ŭziać jaho na padsadku da Bresta.
Ale chutka ŭsio adno nie atrymałasia, bo tolki na «hutarku» i pravierku telefona pajšło dźvie hadziny.
Praŭda, Kamił pryznaŭsia, što ŭ jaho z saboju było dva telefony. Asnoŭny jon schavaŭ u mašynie, a na razmovu ŭ kabiniet pajšoŭ sa svaim druhim smartfonam, na jakim asabliva ničoha niama. I kab jaho dakładna puścili ŭ Biełaruś, skazaŭ, što jedzie tolki ŭ Brest, bo, na jahonuju dumku, skažy jon, što źbirajecca jašče i ŭ Minsk, to ŭ krainu jaho mahli i nie puścić.
U telefonie palaka prahladzieli ŭsie foty, paśla čaho pačali razbłakoŭvać i prahladać usie dadatki.
Taksama ŭ błohiera i jaho spadarožnika staranna pravieryli ŭsie rečy, a mikraaŭtobus adpravili na skanier.
U videa błohier paśla adznačaŭ: jon nikoli nie pahłyblajecca ŭ palityčnyja pytańni, bo nie źjaŭlajecca palitykam, a tamu pakazvaje krainy z turystyčnaha punkta hledžańnia. Za niekalki miesiacaŭ da Biełarusi jutubier naviedvaŭ Rasiju.
Pieršyja ŭražańni ad Bresta
Pieršaje, što ŭraziła palaka ŭ Breście, — vialikaja kolkaść starych pryvatnych budynkaŭ u centry horada, šmat ź jakich mieli šyfierny dach.
Maŭlaŭ, u Polščy raniej takich było taksama šmat, ale kali navukoŭcy paviedamili, što taki dach škodny, to jaho pačali źmianiać.
Dalej jon naviedaŭ staryja katalickija mohiłki ź vialikaj kolkaściu pomnikaŭ na polskaj movie.
Špacyrujučy pa horadzie, jon zavitaŭ u kramu, dzie ŭraziŭsia biełaruskim prysmakam, vialikim vybaram marmieładu i cukierak «Karoŭka» z roznymi smakami. Taksama jon adznačyŭ, što Biełaruś znakamitaja svaim marožanym i što jano nadzvyčaj tannaje.
Pry naviedvańni rynku błohier byŭ pryjemna ździŭleny tym, što šmat ludziej razumieje polskuju movu, moža adkazać na pytańni i padtrymać hutarku.
Jak i inšyja turysty z Zachadu, jon nieadnarazova adznačaŭ, što ŭ Biełarusi ŭsio vielmi tanna: prajezd na taksi i ciahniku, ježa i vypiŭka ŭ restaranach i, kaniečnie ž, aŭtamabilnaje paliva.
Kamiery na kožnym rahu
Praz paru hadzin špacyru pa Breście palaka ŭrazili jašče dźvie rečy: vielmi čystyja vulicy, na jakich nie znojdzieš śmiećcia, i vielizarnaja kolkaść kamier na kožnym rahu.
«Padobna, paru hadoŭ tamu dziaržava šmat inviestavała ŭ sistemu nazirańnia, kab možna było manitoryć kožny ruch na vulicach i raspaznavać tvary», — pryjšoŭ da vysnovy padarožnik.
Kolkaść kamier nie pierastavała ździŭlać błohiera i na druhi dzień — kali jon naviedvaŭ Bresckuju krepaść.
Na terytoryi krepaści jutubier spatkaŭ mužčynu, jaki, daviedaŭšysia, što toj z Polščy, pačaŭ śpiavać polski himn.
Ale, sa słoŭ błohiera, było šmat ludziej, jakija prasili ich nie zdymać, a taksama zabaraniała siabie zdymać achova.
Na vychadzie z krepaści Kamił adznačyŭ, što tam adčuvajecca klimat SSSR.
Z patrabavańniami prypynić zdymki jon sutykaŭsia i ŭ momanty, kali zdymaŭ budynki, jakija naležali siłavym strukturam ci inšym dziaržaŭnym ustanovam.
Błohier adznačyŭ, što ŭ Biełarusi zamiežnik biez prablem moža nabyć simku, ale praz cenzuravany internet šmat jakija sajty nie adkryvajucca.
U Biełarusi vielmi lohka sieści ŭ turmu
Niahledziačy na toje, što Kamił nazyvaje siabie błohieram vyklučna turystyčnym, roznyja palityčnyja pytańni čas ad času ŭzdymalisia.
Naprykład, što ŭ Biełaruś stroha zabaroniena zavozić drony.
«Pry ciapierašnim ładzie navat za nievialikaje hłupstva možna trapić u turmu, a kali znojduć navat reštki narkotykaŭ, to možna sieści na šmat hadoŭ», — skazaŭ jon i dadaŭ, što Biełaruś — adzinaja kraina ŭ Jeŭropie, dzie dahetul isnuje śmiarotnaje pakarańnie.
Što jašče kinułasia ŭ vočy palaku?
Błohier adznačyŭ, što ŭ Biełarusi šmat starych mašyn, u tym liku «Ład», i što ciapier tudy viazuć šmat elektramabilaŭ z Kitaja.
Taksama jon zaŭvažyŭ, što kiroŭcy ŭ Breście pačynajuć prapuskać piešachoda jašče da taho, jak jon kančatkova dajšoŭ da pierachoda.
Ahułam paśla dvuch dzion u Breście ŭ jaho zastalisia źmiešanyja pačućci i niekalki vysnoŭ.
«Nibyta fajna, pryjemna, dobraja ježa, tanna, jość šmat zamiežnych studentaŭ z Azii i Afryki, jakija jeduć vučycca ŭ Biełaruś. Niejkaha takoha režymu pakul nie adčuvaju», — kazaŭ jon.
Pry hetym pierasiačeńnie miažy jon paraŭnaŭ z prachodam praz bramu, jakaja viadzie ŭ śviet SSSR.
«Viedajecie, heta tak dziŭna: ad Varšavy ŭsiaho roŭna 200 kiłamietraŭ [da Bresta], to-bok bližej, čym da Krakava, ale heta adrazu całkam inšy śviet».