Usie biełaruskija banki pačnuć sačyć za miescaznachodžańniem klijentaŭ? Alfa-bank užo papiaredziŭ, admovicca niemahčyma
Z 1 lipienia bankaŭskuju śfieru čakajuć istotnyja pieramieny. Novyja padychody, anansavanyja Nacbankam, u pieršuju čarhu musiać być nakiravanyja na abaronu ad machlaroŭ. Praŭda, niekatoryja mietady vyklikali ŭ biełarusaŭ pytańni. Tak, Alfa-bank užo papiaredziŭ klijentaŭ, što budzie patrabavać ad ich dostup da hieałakacyi mabilnikaŭ i kampjutaraŭ.
«Z 26 maja pry ŭvachodzie ŭ INSNC (dadatak banka — NN) z telefona ci kampjutara źjavicca prośba na dostup da vašaj hieałakacyi. Dazvoł patrebna dać usiaho adzin raz. Kali hetaha nie zrabić, z 1 lipienia dostup da INSNC budzie časova zakryty da ŭklučeńnia hieałakacyi», — paviedamili ŭ banku.
Ilustracyjnaje fota
Dopis z hetaj navinoj u aficyjnym telehram-kanale Alfa-banka sabraŭ sotni niehatyŭnych reakcyj i aburanych kamientaroŭ — ludzi nie razumiejuć, navošta banku viedać dakładnaje miescaznachodžańnie klijenta.
«Heta dadatak dla sačeńnia ŭžo, a nie bankaŭski», — pravodziać paraleli biełarusy.
A što ŭ inšych bankach?
U klijenckaj infarassyłcy Alfa-banka śćviardžajecca, što zhodna z zakanadaŭstvam z 1 lipienia 2026 hoda ŭsie biełaruskija banki abaviazanyja buduć prytrymlivacca novych patrabavańniaŭ pa zbory, zachoŭvańni i analizie «ličbavaha adbitka pryłady».
Što za ličbavy adbitak? Heta taki nabor paramietraŭ, źviazanych z elektronnaj pryładaj, jakoj vy karystajeciesia — siudy ŭvachodzić hieałakacyja, a taksama madel vašaha telefona ci kampjutara, nastrojki braŭziera, viersija apieracyjnaj sistemy i hetak dalej. Hety miks paramietraŭ pry kožnym uvachodzie ŭ bankinh budzie supastaŭlacca z tak zvanym etałonam — naboram dadzienych, charakternym mienavita dla vas.
Infarmacyjnaja rassyłka Alfa-banka
Pakul pra novaŭviadzieńni aficyjna paviedamiŭ tolki Alfa-bank.
U Biełarusbanku na pytańnie žurnalista «Našaj Nivy» pra płany na ŭviadzieńnie novych pravił karystańnia bankinham adkazali, što «takoj infarmacyi ŭ ich na hety momant niama».
Padobnyja abmiežavańni jašče nie ŭvodzić i MTBank (ale hieałakacyja ŭ banku tak ci inakš zaprošvajecca pry rehistracyi, tamu zarehistravacca z-za miažy vielmi składana).
«Kali niešta takoje budzie i ŭ našym banku [jak u kaleh z Alfa-banka], budzie raźmieščanaja dadatkovaja infarmacyja», — adkazaŭ kansultant MTBank.
Bielinviestbank taksama pakul pracuje pa-staromu:
«Na hety momant da nas nie dachodziła infarmacyja pra patrabavańnie na ŭklučeńnie hieałakacyi z boku našaha banka. Najbližejšyja dni takoje patrabavańnie nie budzie ŭkaraniacca. Adnak kali patrabavańnie pra hieałakacyju i źjavicca, chutčej za ŭsio, bank budzie taksama zahadzia apaviaščać klijentaŭ pra heta».
A voś Biełhazprambank užo paćvierdziŭ, što budzie zapytvać u klijentaŭ hieałakacyju. Praŭda, jany jašče nie paśpieli razasłać klijentam infarmacyju. «Pry hetym błakavać dostup da dystancyjnaha bankaŭskaha absłuhoŭvańnia (mabilny dadatak/internet-bank) biez dazvołu na vyznačeńnie miescaznachodžańnia nie płanujecca», — zapeŭnivajuć u banku.
Tearetyčna bankaŭski mabilny dadatak pavinien zapytvać hieałakacyju čałavieka tolki ŭ momant uvachodu ŭ sistemu i tolki dla patrebaŭ sistemy biaśpieki. Adnak u biełaruskaj realnaści, u jakoj siłaviki majuć dostup faktyčna da lubych bazaŭ, instrumient moža pieratvarycca ŭ instrumient dadatkovaha sačeńnia za nasielnictvam.