Tramp adreahavaŭ na stralbu kala Biełaha doma i znoŭ nahadaŭ pra balnuju zału
Prezident ZŠA Donald Tramp padziakavaŭ pravaachoŭnikam za prafiesijnuju pracu kala Biełaha doma, u vyniku jakoj byŭ zabity ŭzbrojeny napadnik. Tramp znoŭ padkreśliŭ nieabchodnaść dabudavać «abaronienuju balnuju zału» ŭ Biełym domie.
Donald Tramp ahladaje budaŭnictva balnaj zały vakoł Biełaha doma 19 maja 2026 h. Fota: AP Photo / Jacquelyn Martin
U svaim paście Donald Tramp napisaŭ Truth Social: «Dziakuj našaj vydatnaj Sakretnaj słužbie i pravaachoŭnym orhanam za chutkija i prafiesijnyja dziejańni, zroblenyja siońnia ŭviečary suprać uzbrojenaha čałavieka kala Biełaha doma, jaki mieŭ kryminalnaje minułaje i, mahčyma, apantanaść samaj darahoj dla našaj krainy pabudovaj. Uzbrojeny čałaviek miortvy paśla pierastrełki z ahientami Sakretnaj słužby kala varot Biełaha doma».
Hety incydent kiraŭnik ZŠA adrazu vykarystaŭ jak arhumient u daŭnim palityčnym i budaŭničym spory, nahadaŭšy pra krasavickuju stralbu padčas viačery Asacyjacyi karespandentaŭ u hateli Washington Hilton:
«Hetaja padzieja adbyłasia praź miesiac paśla stralby na viačery karespandentaŭ Biełaha doma i pakazvaje, nakolki važna dla ŭsich budučych prezidentaŭ atrymać samuju biaśpiečnuju i abaronienuju prastoru takoha typu, jakaja kali-niebudź budavałasia ŭ Vašynhtonie, akruha Kałumbija. Nacyjanalnaja biaśpieka našaj krainy patrabuje hetaha!»
Paśla krasavickaha zamachu ŭ hateli jon užo zajaŭlaŭ, što incydentu nie zdaryłasia b, kab u rezidencyi było ŭłasnaje biaśpiečnaje pamiaškańnie dla takich uračystaściaŭ.
Adnak prajekt sutyknuŭsia z surjoznymi prablemami. Kaštarys budaŭnictva pastajanna ros i, pa apošnich acenkach Trampa, dasiahnuŭ $400 miljonaŭ (pačynaŭsia z $200 młn). Płan respublikancaŭ vydzielić na heta hrošy ź fiederalnaha biudžetu pakul zabłakavany ŭ Sienacie.
Pieršapačatkova prezident ZŠA abiacaŭ, što budaŭnictva «nie zakranie ciapierašni budynak», adnak u vyniku dziela zały całkam źnieśli ŭsio Uschodniaje kryło Biełaha doma.
1 krasavika 2026 hoda sud u ZŠA abaviazaŭ prypynić budaŭničyja pracy.