«Jany chacieli b być doma». Pareštki lidara AUN Mielnika i jaho žonki pierapachavali va Ukrainie
Pareštki lidara Arhanizacyi ŭkrainskich nacyjanalistaŭ (AUN), pałkoŭnika armii Ukrainskaj Narodnaj Respubliki (UNR) Andreja Mielnika i jaho žonki Safii Fiedak-Mielnik 25 maja pierapachavali na Nacyjanalnych vajskovych miemaryjalnych mohiłkach u Kijeŭskaj vobłaści. Na cyrymonii prysutničali prezident Uładzimir Zialenski, kiraŭnik Ofisa Kiryła Budanaŭ, kiraŭnik MZS Andrej Sibiha i šerah ukrainskich palitykaŭ i vajskoŭcaŭ, piša «Suśpilnie».
Cyrymonija pierapachavańnia lidara AUN Andreja Mielnika i jaho žonki na Nacyjanalnych vajskovych miemaryjalnych mohiłkach, Kijeŭskaja vobłaść, Ukraina, 25 maja 2026 h. Fota: Suśpilnie Novini / Viktoryja Puchalskaja
Pavodle słoŭ kiraŭnika ŭkrainskaj dziaržavy, ułady Ukrainy šmat hadoŭ sprabavali viarnuć dadomu vybitnych ukrainskich palityčnych dziejačaŭ i hierojaŭ.
«Ludziej, jakija mahli być z roznych častak palityčnaha śpiektra i čyj los nie byŭ prostym, ale kaho abjadnoŭvali viera va Ukrainu, siła bicca dziela jaje i praha bačyć Ukrainu niezaležnaj. Takich vieličnych postaciaŭ, jakija siońnia spačyvajuć nie doma, a volaj histaryčnaj niespraviadlivaści raskidanyja pa śviecie. […] I ŭsie jany zasłuhoŭvajuć i dakładna chacieli b być doma», — skazaŭ jon.
Zialenski adznačyŭ, što zaraz idzie praca nad pierapachavańniem inšych vybitnych ukrainskich dziejačaŭ.
Jon padziakavaŭ usim, chto pracavaŭ nad viartańniem ukrainskich hierojaŭ dadomu.
«Zaraz z Kiryłam Budanavym i kamandaj Ofisa prezidenta, Ministerstvam zamiežnych spraŭ, z uradam Ukrainy i z usimi, chto dałučany, my napaŭniajem vialikim źmiestam słova, jakoje časta hučyć i pavinna hučać paŭnavartasna. Słova — pavaha. Pavaha da ŭkrainskich hierojaŭ. Słava kožnamu ŭkrainskamu hieroju!» — reziumavaŭ Zialenski.
Andrej Mielnik byŭ viadomym vajskovym i palityčnym dziejačam XX stahodździa. Jon słužyŭ u vojsku Ukrainskaj Narodnaj Respubliki i byŭ blizkim paplečnikam pieršaha kiraŭnika AUN Jaŭhiena Kanavalca. Paśla śmierci Kanavalca ŭ 1938 hodzie mienavita Mielnik uznačaliŭ AUN i kiravaŭ jaje bolš pamiarkoŭnym kryłom — AUN (m), — u adroźnieńnie ad bolš radykalnaj hrupy Ściapana Bandery — AUN (b).
U roznyja pieryjady žyćcia Mielnik pieražyŭ aryšt i źniavoleńnie polskimi ŭładami, a taksama znachodziŭsia ŭ nacysckim kancłahiery Zaksienchaŭzen. Paśla Druhoj suśvietnaj vajny jon zajmaŭsia abjadnańniem ukrainskaj emihracyi i vykazaŭ ideju stvareńnia Suśvietnaha kanhresa ŭkraincaŭ.
Pamior Mielnik u 1964 hodzie ŭ Luksiemburhu, dzie i byŭ pachavany da siońnia. Napiaredadni tam ekshumavali jahony prach.