Va ŭkrainski pałon trapiŭ jašče adzin hramadzianin Biełarusi. Jon źviarnuŭsia da Łukašenki

Hramadzianin Biełarusi Ivan Anienkaŭ z Vaŭkavyska, jaki vajavaŭ na baku Rasii suprać Ukrainy i trapiŭ va ŭkrainski pałon, źviarnuŭsia da Alaksandra Łukašenki pa dapamohu, kab viarnucca na radzimu, piša «Radyjo Svaboda».

Ivan Anienkaŭ. Skrynšot ź videa

Jak paviedamili ŭ telehram-kanale «Opierativnij ZSU», Ivan Uładzimiravič Anienkaŭ naradziŭsia 9 vieraśnia 1977 hoda i vajavaŭ pad pazyŭnym «Stary» ŭ 164‑j asobnaj motastrałkovaj bryhadzie Suchaputnych vojskaŭ Rasii (miesca pastajannaj dysłakacyi — Alejsk Ałtajskaha kraju).

Zhodna ź infarmacyjaj ukrainskaha boku, pałonny biełarus pachodzić z Vaŭkavyska. Jak jon raskazaŭ ukrainskim vajskoŭcam, na kantrakt jon trapiŭ z rasijskaj turmy, u jakoj adbyvaŭ pakarańnie ŭ vyhladzie pazbaŭleńnia voli na 5 hadoŭ za naŭmysnaje naniasieńnie ciažkaj škody zdaroŭju. U Rasiju Anienkaŭ jeździŭ na pracu. Jon adsiedzieŭ 2 hady i vyrašyŭ padpisać kantrakt z rasijskaj armijaj.

Na pieršym ža bajavym zadańni Anienkaŭ atrymaŭ ranieńnie i viarnuŭsia ŭ svaju vajskovuju častku, udzielničaŭ u prapahandysckich televizijnych repartažach. Potym jaho viarnuli na front, dzie jon atrymaŭ druhoje ranieńnie, paśla jakoha znoŭ viarnuŭsia na front. Ukrainskija resursy śćviardžajuć, što jon kanfliktavaŭ z aficerami praz toje, što jany nie zapaŭniali žurnał bajavych dziejańniaŭ i jon nie moh atrymać hrošy za ranieńni.

Paśla skarhaŭ biełarusa znoŭ adpravili na front. Kali Anienkaŭ razam ź inšymi rasijskimi vajskoŭcami sprabavaŭ zamacavacca na pazicyjach, ich atakavali ŭkrainskija drony. Paśla hetaha jon trapiŭ u pałon.

Uziali Anienkava ŭ pałon vajskoŭcy 18‑j bryhady Nacyjanalnaj hvardyi Ukrainy. Heta adbyłosia na limanskim kirunku, u rajonie pasielišča Jampal Kramatorskaha rajona Danieckaj vobłaści. Ciapier ža jon źviarnuŭsia da Alaksandra Łukašenki, kab toj dapamoh jamu viarnucca na radzimu.

Kamientary da artykuła