Cichanoŭskaja i Zialenski sustrelisia ŭ Kijevie
«Łukašenka skazaŭ, što ŭžo čas sustrecca prezidentam Ukrainy i Biełarusi», — pažartavaŭ Zialenski.
Śviatłana Cichanoŭskaja i Uładzimir Zialenski, Kijeŭ, 26 maja 2026. Fota: Naša Niva
Śviatłana Cichanoŭskaja i prezident Ukrainy Uładzimir Zialenski sustrelisia ŭ Kijevie padčas Mižnarodnaha samita haradoŭ i rehijonaŭ.
Pieraličvajučy haściej forumu, Zialenski padčas svajoj pramovy adznačyŭ, što Biełaruś udzielničaje ŭ takim farmacie ŭpieršyniu. Jon pažartavaŭ.
«Łukašenka skazaŭ, što ŭžo čas sustrecca prezidentam Ukrainy i Biełarusi, — zrabiŭ jon paŭzu i pahladzieŭ u zału, zaŭśmichaŭšysia. — I cikava vyjšła: skazaŭ Łukašenka, a pryjechała Śviatłana Cichanoŭskaja. Rady vas bačyć, Śviatłana!».
Skrynšoty z tranślacyi
Cichanoŭskaja vystupiła z pramovaj adrazu paśla Zialenskaha. Jaje pradstavili jak kiraŭnicu Abjadnanaha pierachodnaha kabinieta.
«Dla mianie vialiki honar być tut, u Kijevie, razam z vami. Siońnia Ukraina natchniaje ŭvieś śviet», — pačała svaju pramovu Cichanoŭskaja.
Jana adznačyła, što Ukraina zmahajecca nie tolki za siabie, ale «za ŭsie nacyi, jakija zanadta doŭha žyli ŭ cieniu impieryi», i płacić za toje vielizarnuju canu.
«My, biełarusy, taksama niasiom adkaznaść za toje, što adbyvajecca va Ukrainie. Ale ja prašu vas padzialać złačynny režym Łukašenki, jaki słužyć Rasii, i biełaruski narod, jaki staić razam z Ukrainaj.
Mnohija biełarusy ŭžo dapamahajuć Ukrainie — jak dobraachvotniki na poli boju, jak partyzany, jakija čyniać sabataž suprać rasijskich vojskaŭ, i achviarujučy hrošy na ŭkrainskuju armiju.
I biełarusy taksama buduć hatovyja dapamahčy ŭ adnaŭleńni Ukrainy. (…)
Ale samaje važnaje, što Biełaruś moža i pavinna dać Ukrainie ŭ budučyni — heta biaśpieka. Harantyja taho, što bolš za tysiaču kiłamietraŭ sumiesnaj miažy buduć u biaśpiecy. Što Biełaruś bolš nikoli nie stanie płacdarmam dla ahresii. Što rasijskija tanki bolš nikoli nie rušać praź Biełaruś u bok Čarnihava, Žytomira, Roŭna ci Kijeva».
Cichanoŭskaja adznačyła, što vieryć, što i Ukraina dapamoža biełarusam spačatku demantavać dyktaturu, a potym — adbudavać krainu paśla 30 hadoŭ dyktatury.
Jana taksama vykazała zachapleńnie mužnaściu Zialenskaha. «Kali pačałasia vajna, vy zastalisia sa svaim narodam zamiest taho, kab zdacca. Vy pakazali roźnicu pamiž lidaram, jaki staić sa svajoj nacyjaj, i dyktataram, jaki zdradžaje svajoj krainie na karyść zamiežnaj impieryi, kab uratavać siabie».
Paźniej adbyłasia sustreča Cichanoŭskaj i Zialenskaha za začynienymi dźviaryma. Prysutničali taksama daradcy Cichanoŭskaj Franak Viačorka i Dzianis Kučynski, jaje namieśnik u Kabiniecie Pavieł Łatuška.
Abmiarkoŭvali pytańni pa supracoŭnictvie ź biełaruskimi demakratyčnymi siłami (stvareńnie mižviedamasnaj hrupy i pryznačeńnie śpiecpradstaŭnika pa Biełarusi, kab vyrašać kanretnyja prablemy) i sankcyjnym cisku na režym. Cichanoŭskaja adznačyła: Ukraina razumieje, što Łukašenka suahresar, i nikoli jamu hetaha nie prabačyć.
«Vizit va Ukrainu — heta vielmi jasny palityčny mesedž [ad Ukrainy], što my bačym Biełaruś volnaj, demakratyčnaj, biaśpiečnaj, i my hatovy dapamahać biełarusam u dasiahnieńni hetaj mety, — skazała Śviatłana Cichanoŭskaja. — Ja nie baču niejkaha imknieńnia z ukrainskaha boku palityčna anhažavacca z režymam Łukašenki».
Abmiarkoŭvali taksama prablemy ź lehalizacyjaj biełarusaŭ, jakija žyvuć va Ukrainie. Zialenski, pa słovach Cichanoŭskaj, pieradaŭ zadaču hetym zaniacca.
Na sustrečy Cichanoŭskaja taksama padniała pytańnie ab kalinoŭcach, jakija ŭ pałonie z červienia 2022 hoda — heta Jan «Trombli» Dziurbiejka i Siarhiej «Klešč» Dziohcieŭ. Ich imiony byli ŭklučany va ŭkrainskija śpisy na abmien pałonnymi jašče ŭ lipieni 2022 hoda, ale rasijski bok admaŭlajecca addavać biełarusaŭ.