Nieviadomyja dasyłajuć biełaruskaj aktyvistcy ŭ Polščy pachavalnyja vianki i zdymki z pomnikami ŭsim členam jaje siamji
Administratarku šełtara dla eks-palitviaźniaŭ u Varšavie i paplečnicu Paŭła Łatuški ŭ Kaardynacyjnaj radzie Hannu Fiedaronak praciahvajuć kašmaryć.
Usio pačałosia z pastoŭ pra zbor srodkaŭ na pachavańnie aktyvistki ŭ sacsietcy X, praciahnułasia padkidvańniem pachavalnaha vianka pad šełtar, dzie pracuje Hanna. Ciapier ža žančynu zapužvajuć karcinkami z nafotašoplenymi pomnikami sa zdymkami členaŭ siamji — na ich jaje dzieci i ŭnuki.
«Ja nie viedaju, čaho ad mianie chočuć hetyja ludzi, čaho damahajucca. Spačatku ja dumała, što heta dyskredytacyja mianie pierad vybarami ŭ Kaardynacyjnuju radu, zapužvańnie, ale vybary ŭžo prajšli», — kamientuje Hanna.
Hanna Fiedaronak. Fota z asabistaha archiva
Paśla taho, jak Hańnie pryvieźli vianok, pierakinuŭšy jaho za płot šełtara, dzie jana pracuje, žančyna adniesła zajavu ŭ palicyju. Padtrymaŭ jaje i haspadar doma — palak, u jakoha biełarusy arandujuć dom pad šełtar dla palitviaźniaŭ.
Toj samy vianok, jaki pryvieźli žančynie na mašynie nieviadomyja. Kamiery videanazirańnia zafiksavali ich vizit. Hety rolik taksama pieradadzieny palicyi
Dadatkova, pieražyvajučy za svaju biaśpieku, žančyna źviarnułasia ŭ prakuraturu i ABW — ahienctva ŭnutranaj biaśpieki Polščy. Hanna kaža, što pieršapačatkova ŭ palicyi nie chacieli prymać jaje zajavu, tut i dapamoh haspadar-palak, jaki pieršapačatkova vyrašyŭ, što hety «padarunak» dla jaho.
«Heta ŭsio ž nie prosta trolinh u internecie. Mnie pryvieźli realny vianok realnyja ludzi, jany zamachnulisia na pryvatnuju ŭłasnaść. Ja heta publiču i nie maŭču, kab dadatkova paŭpłyvać na polskija ŭłady. Heta ŭsio ž niebiaśpieka i ich krainy, bo, atrymlivajecca, niejkija špijony znachodziacca na ich terytoryi. Nikomu, dumaju, nie patrebnaja druhaja Anžalika Mielnikava, kali ja źnianacku źniknu», — nie chavaje abureńnia aktyvistka.
«Pomniki» Hańnie i členam jaje siamji. Fota: asabisty archiŭ žančyny
Apošniaja pahroza pryjšła aktyvistcy siońnia, i ŭ joj pišuć, što jana moža čakać haściej na adkryćci «domika» (majecca na ŭvazie navasielle šełtara).
Dadatkova nieviadomyja vykarystali zdymki ŭžo z unukami Hanny Fiedaronak. «Kali dzieci ciabie nie začapili, to, moža, unuki razvarušać», — napisaŭ ananim u telehramie, padpisany Bartekam.