Sabalenka adkazała na paproki, što jana, usia ŭ bryljantach, patrabuje padvysić pryzavyja
Biełaruskaja tenisistka i pieršaja rakietka śvietu Aryna Sabalenka prakamientavała krytyku na svoj adras, što jana patrabuje pavieličeńnia pryzavych na turnirach «Vialikaha šlema», pakul sama, miljanierka, nosić daražeznyja rečy i ŭpryhožvańni.
Pavodle acenak tabłoidaŭ, na šyi Aryny Sabalenki — karali z bryljantami vahoj 23 karaty i hranatami na 200 karat, a taksama zavušnicy z hetaj ža kalekcyi. Fota: Robert Prange / Getty Images
Padčas pres-kanfierencyi spartsmiency zadali pytańnie, ci nie vyhladajuć jaje zakliki kryvadušnaściu na fonie našeńnia darahich bryljantaŭ. Sabalenka kateharyčna adchiliła takija paraleli, piša «Trybuna».
— Ja zusim nie razumieju, jak možna paraŭnoŭvać dźvie zusim roznyja rečy.
Jak ja ŭžo kazała, pryzavyja nie tyčacca mianie asabista. Ja prosta zmahajusia dziela hulcoŭ ź nizkim rejtynham, jakim sapraŭdy ciažka vyžyvać u śviecie tenisa. Toje, što ja zmahajusia za pryzavyja, nie maje da mianie nijakaha dačynieńnia. Usie viedajuć, što ŭ mianie ŭsio dobra. My zmahajemsia za spraviadlivuju dolu dachodaŭ, a taksama za hulcoŭ z bolš nizkim rejtynham, za tych, chto viartajecca paśla traŭm, i za toje, kab nastupnamu pakaleńniu było lahčej uvajści ŭ top-10. Tamu heta nie dziela siabie, — skazała jana.
Aryna Sabalenka — pieršaja rakietka śvietu i adna z samych vysokaapłatnych spartsmienak śvietu.
U pačatku maja jana i jašče 19 topavych tenisistaŭ padpisali adkryty list da arhanizataraŭ Adkrytaha čempijanatu Francyi. Zorki sportu vykazali niezadavolenaść sumami pryzavych i prystrašyli bajkotam turniru. Jany patrabujuć padvyšeńnia pryzavych adpaviedna rostu dachodaŭ arhanizataraŭ turniraŭ.
Padpisanty zvarotu — vysokaapłatnyja spartsmieny — namahajuć: źmianieńnie sistemy dapamoža ŭsim. U tenisie isnuje kałasalnaje rassłajeńnie, i hulcy za miežami top-100 časta pracujuć u stratu z-za vysokich vydatkaŭ na trenieraŭ i pieraloty.