U Kaściukovičach praź biržu pracy šukajuć namieśnika staršyni rajvykankama — apošni kandydat nie prajšoŭ pravierki
Zarobak salidny, 6‑7 tysiač rubloŭ.
Kaściukovicki rajvykankam. Fota: kostukovichi.gov.by
Kaściukovicki rajvykankam pravodzić kastynh na pasadu namieśnika staršyni rajvykankama — vakansija ŭ kresła adkaznaha za raźvićcio architektury i horadabudaŭnictva, a taksama žyllovaj palityki źjaviłasia na sajcie słužby zaniataści.
Budučamu namieśniku abiacajuć zarobak ad 6 da 7 tysiač rubloŭ. Kandydat pavinien mieć vyšejšuju adukacyju, najaŭnaść piacihadovaha stažu ŭ dziaržaŭnych strukturach. Vitajucca pretendenty z dośviedam u śfiery budaŭnictva.
Skrynšoty: gsz.gov.by
U adździele kadraŭ paćviardžajuć, što pazicyja na namieśnika sapraŭdy adkrytaja na kankurentnych umovach. Praŭda, pryznajucca, što «asnoŭny kandydat užo ŭ raspracoŭcy».
«Kandydatura prachodzić pravierku. Ale adpraŭlajcie reziume, u vas jość usie pravy na heta. Moža, i hetaja kandydatura nie projdzie ŭsie pravierki, bo pieršaja nie prajšła. Ja razdrukuju vaša reziume, adznaču ŭsie dadzienyja. U nas jašče dva tak lažyć».
Pracavać budučy namieśnik budzie pad kiraŭnictvam Natalli Asmałoŭskaj — jaje pryznačyli staršynioj Kaściukovickaha rajvykankama ŭ pačatku hetaha hoda.
Były ž namieśnik pa architektury pratrymaŭsia na svajoj pasadzie mienš za hod — Alaksandr Sidarenka pačaŭ svaju karjeru čynoŭnika ŭ mai 2025 hoda. Jašče ŭ lutym 2026‑ha jon pravodziŭ u svaim kabiniecie pramuju telefonnuju liniju.