Jašče adzin staličny teatr uznačaliŭ režysior z Rasii
Mastackim kiraŭnikom staličnaha Novaha dramatyčnaha teatra staŭ režysior Juryj Papoŭ. Jaho proźvišča źjaviłasia na sajcie kalektyvu, piša «Lusterka»
Juryj Papoŭ, fota bnkomi.ru
Papoŭ rodam z Rasii. Jamu 53 hady, jon pracavaŭ u tamtejšych pravincyjnych kalektyvach. Adnosna niadaŭna pierajechaŭ ź siamjoj u našu krainu, staŭ vykładać u staličnaj Akademii mastactvaŭ i pastaviŭ u Kamiernym dramatyčnym teatry (heta pryvatny prajekt Natalli Bašavaj) śpiektakl «Kruhi na vadzie». Pastanoŭku z takoj ža nazvaj jon rabiŭ u pravincyjnym rasijskim horadzie Sieviersk, što ŭ Tomskaj vobłaści.
U lutym 2026 hoda Natalla Bašava stała dyrektaram Novaha dramatyčnaha teatra. Naprykancy krasavika jana pastaviła ŭ hetym kalektyvie svoj pieršy śpiektakl — «Maładaja hvardyja» pavodle adnajmiennaha skandalnaha tvora savieckaj litaratury. Ciapier ža jana zaprasiła Papova na pracu ŭ svoj kalektyŭ.
Pieršym śpiektaklem režysiora ŭ novym statusie stała pastanoŭka pavodle tvora ruskaj litaratury — «Čudziki» Šukšyna.
Papoŭ — nie pieršy pradstaŭnik Rasii na čale biełaruskich teatraŭ. U 2025 hodzie mastackim kiraŭnikom minskaha Opiernaha staŭ rasijanin Arciom Makaraŭ. I navat u Nacyjanalnym akademičnym teatry imia Janki Kupały ŭ 2026 hodzie anałahičnuju pasadu zaniaŭ jaho suajčyńnik Dźmitryj Akimaŭ. Heta ŭsio ludzi, jakija nie viedajuć biełaruskaj kulturnaj tradycyi.