Inicyjatyva Maldzis viarnuła malunak Vosipa Lubiča
Inicyjatyva Maldzis nabyła na aŭkcyjonie ŭ Izraili malunak jarkaha pradstaŭnika Paryžskaj škoły mastactva Vosipa Lubiča, jaki byŭ rodam z Horadni.
Fota: Maldzis
«Vosip Lubič — heta prykład taho, jak tvorčaść mastaka z Horadni stanovicca častkaj jeŭrapiejskaha mastackaha kanonu, ale jahonaja postać i siońnia zastajecca małaviadomaj u Biełarusi. My chočam heta źmianić praź viartańnie ŭ biełaruski kantekst jahonaha imia i tvorčaści», — kaža kiraŭnik inicyjatyvy Maldzis Pavieł Macukievič
Malunak Lubiča «Rabočyja» byŭ nabyty na srodki miecenatki, jakaja pažadała zastacca niepubličnaju.
U budučyni nabyty tvor płanujecca pieradać u Horadniu ŭ jakaści hramadskaha padarunka.
Fota: Maldzis
«Malunak Lubiča adkryvaje novy raździeł u historyi dziejnaści Maldzis. Heta krok da farmavańnia bolš cełasnaha bačańnia biełaruskaj kulturnaj spadčyny, jakaja ŭklučaje nie tolki archiŭnyja i histaryčnyja kaštoŭnaści, a i vyjaŭlenčaje mastactva», — kaža apiakun inicyjatyvy Ryhor Astapienia.
27 červienia malunak možna budzie pabačyć u miežach «Art-kaviarni Maldzis ź Dźmitryjem Sałodkim» u Varšavie.
Pra Vosipa Lubiča
Vosip Lubič (1896—1990) — mastak biełaruskaha pachodžańnia, adzin z pradstaŭnikoŭ Paryžskaj škoły.
Naradziŭsia ŭ Hrodnie ŭ jaŭrejskaj siamji. Vučyŭsia ŭ Adesie, dzie atrymaŭ kłasičnuju mastackuju adukacyju. U 1920‑ym hodzie pierajechaŭ u Bierlin, pracavaŭ mastakom-dekarataram dla teatra, opiery, kino. Heta paŭpłyvała na jahonuju vizualnuju movu i cikavaść da sceničnych vobrazaŭ.
Fota: Wikimedia Commons
Z 1923‑ha hoda žyŭ u Paryžy, u asiarodździ Manparnasa — centra mastackaha žyćcia taho času. Tut jon sfarmavaŭsia jak mastak Paryžskaj škoły. Jahonaja tvorčaść uklučaje partrety, piejzažy, naciurmorty, ale najbolš vyrazna jon vyjaviŭ siabie ŭ scenach z teatralnaha i cyrkavoha žyćcia.
Padčas Druhoj suśvietnaj vajny Lubič byŭ aryštavany i trapiŭ u łahier Dransi, adkul zdoleŭ uciačy. Paśla vajny praciahvaŭ žyć i pracavać u Paryžy.
Jahonyja tvory siońnia znachodziacca ŭ muziejach i pryvatnych zborach pa ŭsim śviecie, u tym liku ŭ Biełarusi — u Nacyjanalnym mastackim muziei i karparatyŭnaj kalekcyi «Biełhazprambanka».
Los i spadčyna Lubiča mocna jadnajuć Biełaruś z Francyjaj, Niamieččynaj dy Izrailem.