U Italii ramantujuć unikalnuju mazaiku, jakaja paciarpieła ad dziŭnaha turystyčnaha rytuału
U miłanskaj Halerei Viktara Emanuiła II pačali restaŭracyju pa adnaŭleńni znakamitaj mazaiki z vyjavaj turynskaha byka, jakuju paškodzili turysty, što imknulisia pryciahnuć «udaču», piša Bi-bi-si.
Restaŭratar Džanłuka Hali pracuje sa staražytnaj mazaikaj. Fota: Pier Marco Tacca via Getty Images
Zhodna z prykmietaj, kab pryciahnuć udaču, naviedvalnik pavinien z zapluščanymi vačyma trojčy paviarnucca na piatach, staŭšy na «miesca siły» — na vyjavu hienitalij byka.
Turysty, jakija imknucca pryciahnuć udaču, užo vytaptali cełuju jamu na «ščaślivym miescy», całkam ścioršy mazaiku.
«Tysiačy ludziej štodnia vykonvajuć znakamity rytuał, kruciačysia na piatach», — patłumačyli pradstaŭniki haradskich uład.
Tam adznačyli, što ružovyja plitki, jakija adlustroŭvajuć hienitalii byka, całkam ścirajucca.
Bežava-błakitnaja mazaika z vyjavaj byka (hierba Turyna) raźmieščanaja ŭ Halerei Viktara Emanuiła II u centry Miłana. Fota: Getty Images
Na padłozie centralnaj vaśmikutnaj zały halerei, uźviedzienaj u druhoj pałovie XIX stahodździa, raźmieščanyja mazaiki z vyjavami hierbaŭ čatyroch hałoŭnych haradoŭ Karaleŭstva Italija: Ryma (vaŭčyca), Miłana (čyrvony kryž), Fłarencyi (lileja) i Turyna (byk).
Ciapier handlovaja halereja Viktara Emanuiła II źjaŭlajecca adnoj z turystyčnych słavutaściaŭ Miłana. Jana adkrytaja dla naviedvalnikaŭ kruhłasutačna. Tut raźmieščanyja kramy mnohich modnych brendaŭ i restarany, a taksama pravodziacca vystavy i kancerty.
Restaŭracyja mazaiki z vyjavaj hierba Turyna pačałasia na hetym tydni: vyjavu byka aharadzili. Restaŭratary pracujuć nad tym, kab viarnuć tvoru mastactva jaho raniejšuju vielič, havorycca ŭ zajavie haradskoj rady Miłana.
Fota: Stefano Rellandini /AFP via Getty Images
Na fatahrafii bačna, jak majstar Džanłuka Hali staić na kaleniach pierad mazaikaj, uručnuju vyrazajučy novyja kamiennyja frahmienty.
Vakoł jaho źbirajucca naziralniki, pazbaŭlenyja pakul mahčymaści vykanać rytuał «na ŭdaču».
Rytuał pryciahnieńnia «ŭdačy» z dapamohaj mazaiki staŭ papularnym siarod žycharoŭ Miłana jašče ŭ XIX stahodździ.
«Heta, vierahodna, kranalnaja tradycyja, ale davoli škodnaja dla tvora mastactva», — kaža Džanłuka Hali.
Plitka znošvajecca adnosna chutka: apošniuju restaŭracyju mazaiki z bykom pravodzili ŭ 2017 hodzie, raskazali členy haradskoj rady Emanuele Konte i Marka Hraneli.
«Halereja — heta žyvaja spadčyna, jakaja moža razburacca mienavita tamu, što jaje lubiać i aktyŭna vykarystoŭvajuć: my kłapocimsia pra jaje, kab jana zastavałasia takoj, jakoj była stvorana», — dadali jany.
Čytajcie taksama:
Maršrut vychadnoha dnia na zachad ad Minska: duch baroka, unikalnyja mazaiki i skryžavańnie relihij
Prypynak z mazaikaj u Rečyckim rajonie ŭratavać nie ŭdałosia — jaho rychtujuć da znosu
U Jehipcie znajšli antyčnaje sudna, jakoje raniej bačyli tolki na mazaikach