Departavany biełarus viarnuŭsia ŭ Rasiju pa prach pamierłaj žonki — i atrymaŭ dzieviać miesiacaŭ kałonii
Sudździa paličyŭ, što heta nie tyja abstaviny, kali možna parušać zabaronu na ŭjezd.
Nievielski rajonny sud Pskoŭskaj vobłaści Rasii asudziŭ biełarusa A. Kacebu za toje, što toj viarnuŭsia ŭ Rasiju, choć mieŭ zabaronu na ŭjezd.
Jak vynikaje z apielacyjnaj pastanovy ad 20 maja 2026 hoda, historyja pačałasia jašče ŭ 2023-m. Tady Maskoŭski rajonny sud Pieciarburha prysudziŭ Kacebu try hady źniavoleńnia za narkotyki (č. 2 art. 228 KK RF). U vieraśni 2025 hoda jaho ŭmoŭna-daterminova vyzvalili, ale adnačasova pryznali jaho znachodžańnie ŭ Rasii niepažadanym i vynieśli rašeńnie ab departacyi. Mužčynu zabaranili ŭjezd u Rasiju na piać hadoŭ i pad podpis papiaredzili, što za parušeńnie zabarony jamu pahražaje kryminalnaja sprava. U toj ža dzień jaho departavali ŭ Biełaruś.
Adnak u studzieni 2026‑ha Kaceba vyrašyŭ viarnucca ŭ Pieciarburh — pavodle jaho słoŭ, kab zabrać prach pamierłaj žonki i razabracca z kvateraj u pasiołku Šušary.
Mužčyna kupiŭ bilet na mižnarodny ciahnik «Homiel — Sankt-Pieciarburh». Praz paŭtary hadziny paśla prachodžańnia miažy jaho źniała ź ciahnika i zatrymała pamiežnaja słužba FSB.
17 sakavika 2026 hoda Nievielski rajonny sud pryznaŭ Kacebu vinavatym u niezakonnym pierasiačeńni miažy (č. 2 art. 322 KK RF) i pryznačyŭ dzieviać miesiacaŭ kałonii strohaha režymu.
Vosieńniu 2026 hoda Kacebu vyzvalać — i ŭ čarhovy raz departujuć. Zabrać prach žonki i vyrašyć pytańni z kvateraj jon znoŭ nie zmoža.