U Armienii pačali razdavać pozvy na vajskovyja zbory tym, chto pryjazdžaje z Rasii na vybary

Chto admovicca — budzie pryciahnuty da kryminalnaj adkaznaści.

Aeraport u Jerevanie. Fota: Jan Woitas/picture alliance via Getty Images

Hramadzianam Armienii, jakija prybyvajuć z Rasii dla ŭdziełu ŭ parłamienckich vybarach, u aeraporcie Jerevana i na miažy pačali vydavać pozvy dla ŭdziełu ŭ vajskovych zborach. Pra heta paviedamiŭ namieśnik kiraŭnika aparata premjer-ministra respubliki Taron Čachajan, paviedamlaje «RIA «Naviny». 

— Hramadzianie Armienii, jakija prybyvajuć «za chabar» z Rasii, buduć pryzvany na 25‑dzionnyja vučebnyja zbory, a chto admovicca — budzie pryciahnuty da kryminalnaj adkaznaści, — skazaŭ Čachajan.

Vajskovyja zbory ŭ Armienii ŭ 2026 hodzie prachodziać z 31 sakavika pa 19 červienia. Ministr abarony respubliki Suren Papikian adznačyŭ, što kali hramadzianin, jaki prybyŭ u Armieniju, źjaŭlajecca vajennaabaviazanym, to ŭ jaho jość abaviazak pierad radzimaj. Pry hetym, pa jaho słovach, heta datyčycca taksama tych, chto prybyvaje z Francyi, ZŠA i inšych krain.

Raniej pisałasia, što Rasija nibyta choča adpravić 100 tysiač armianaŭ, što žyvuć u hetaj krainie, hałasavać suprać Pašyniana, bo hałasavańnie z-za miažy zabaroniena.

Parłamienckija vybary ŭ Armienii zapłanavany na 7 červienia. U ich udzielničajuć kiroŭnaja partyja «Hramadzianskaja damova» na čale z premjer-ministram Nikołam Pašynianam, błok «Armienija» pad kiraŭnictvam pieršaha prezidenta Nahornaha Karabacha i prezidenta Armienii ŭ 1998—2008 hadach Robierta Kačarana, «Mocnaja Armienija», jakuju ŭznačalvaje Samveł Karapiecian, a taksama «Kvitniejučaja Armienija» i «Kryły adzinstva».

Kamientary da artykuła