Brytanija 25 hadoŭ nie moža departavać biełarusa — toj chłusić biełaruskim uładam, što jon nie svoj. I jany nie zabirajuć jaho dadomu
Mužčyna paśpieŭ atrymać u Brytanii niekalki kryminalnych spraŭ, a ciapier patrabuje, kab jaho narešcie lehalizavali.
Łondan. Ilustracyjnaje fota
Viarchoŭny sud Vialikabrytanii pastaviŭ kropku ŭ spravie, jakaja ciahnułasia čverć stahodździa: hramadzianin Biełarusi davioŭ svajo niežadańnie viartacca na radzimu da najvyšejšaj sudovaj instancyi karaleŭstva — i prajhraŭ. Ale sam fakt, što sprava tudy dajšła, užo varty asobnaj historyi.
Imia hieroja sud zasakreciŭ: zabaroniena raskryvać što-kolviek, što dazvoliła b jaho apaznać. U dakumientach jon fihuruje prosta jak «AM».
Jak usio pačałosia
AM pryjechaŭ u Brytaniju ŭ 1998-m, tady jamu byŭ 21 hod. Jon paprasiŭ prytułak, ale atrymaŭ admovu. Brytanskija ŭłady vyrašyli vysłać jaho na radzimu — i tut pačałosia samaje cikavaje.
U 2001‑m jaho pasadzili na samalot u Biełaruś. Ale na miažy AM paviedamiŭ biełaruskim pamiežnikam niešta takoje, paśla čaho tyja vyrašyli: hety čałaviek — nie biełarus. Jaho nie puścili i adpravili nazad u Łondan.
Z taho momantu schiema pracavała biezdakorna. Brytanija raz za razam sprabavała pieradać AM Minsku — praz pasolstva ŭ 2003-m, praz telefonnaje intervju ź biełaruskimi čynoŭnikami ŭ 2019-m. I kožny raz biełaruski bok, vysłuchaŭšy jaho, prychodziŭ da vysnovy, što nie moža apaznać u im svajho hramadzianina, i admaŭlaŭsia vydavać dakumienty.
Sam Viarchoŭny sud sfarmulavaŭ heta sucha: AM «vypracavaŭ naŭmysnuju stratehiju chłuśni, zabłytvańnia i padmanu», kab nie dać paćvierdzić svaju asobu.
Vynik: departavać jaho niemahčyma, bo kraina, u jakuju jaho vysyłajuć, nie pryznaje jaho svaim. A inšaj radzimy ŭ jaho niama.
Žyćcio biez dazvołaŭ, ale i biez departacyi
Usie hetyja hady AM pražyŭ u Brytanii ŭ padviešanym stanie — biez dazvołu na znachodžańnie, biez prava pracavać, biez dostupu da paŭnavartasnaj miedycyny, na minimalnaj dapamozie.
Za hety čas paśpieŭ atrymać niekalki sudzimaściaŭ — za naniasieńnie cialesnych paškodžańniaŭ i niezakonnaje pazbaŭleńnie voli, za padrobku dakumientaŭ i za našeńnie zbroi, — a taksama prablemy sa zdaroŭjem i zaležnaść.
Mienavita na padviešany stan jon i paskardziŭsia: maŭlaŭ, heta parušaje jaho prava na pryvatnaje žyćcio, i Brytanija abaviazana narešcie vydać jamu dazvoł na znachodžańnie i dazvolić pracavać.
I dva nižejšyja sudy ź im pahadzilisia.
Što skazaŭ Viarchoŭny sud
A voś piać sudździaŭ Viarchoŭnaha suda — nie. Adnahałosna, 24 krasavika 2024 hoda.
Łohika prostaja: čałaviek sam stvaryŭ svajo stanovišča naŭmysnaj chłuśnioj, i ŭznaharodžvać jaho za heta dazvołam na znachodžańnie — značyć pakazać usim astatnim, što sabataž ułasnaj departacyi pracuje. Dziaržava ŭžo zabiaśpiečyła jamu dach i ježu, kab jon nie apynuŭsia na vulicy, — a bolšaha artykuł 8 Jeŭrapiejskaj kanviencyi nie patrabuje.
AM zastajecca ŭ Brytanii ŭ tym samym padviešanym stanie. Nichto tak i nie zmoh dakazać, što jon biełarus. Ale i brytancam pryznać nie chočuć.