U biełaruskim karšerynhu jeździać aŭto na rasijskich numarach. Heta ŭvohule narmalna?
U navinie pra avaryju z udziełam karšerynhavaha VW Polo siedan možna zaŭvažyć, što mašyna maje rasijskija rehistracyjnyja numary.
Minski karšerynh z maskoŭskimi numarami
Niahledziačy na toje, što mašyna maje rasijskuju rehistracyju, jana zdajecca ŭ Minsku, pra što śviedčać nalepki z nadpisam «Minsk» na piarednich dźviarach.
Čamu karšerynh biełaruski, a numary rasijskija?
Reč u tym, što karšerynh Anytime maje adny karani z rasijskim «Delimabilem», pryčym karani hetyja navat nie rasijskija, a italjanskija.
Źjaŭleńnie ŭ biełaruskim parku mašyn z rasijskimi numarami najchutčej tłumačycca tym, što dla rasijskich miehapolisaŭ VW Polo sedan — nadta stary aŭtamabil. Tamu dažyvać svoj viek jaho adpravili ŭ Biełaruś.
Aŭtamabil z naviny akurat maje 799‑y rehijon na numarach, što aznačaje prynaležnaść da Maskvy.
Mašyny na rasijskich numarach u Anytime pačali źjaŭlacca ź minułaha leta. Pry hetym važna adznačyć, što, choć jany i majuć rasijskuju prapisku, pajechać na takim aŭto ŭ Rasiju nielha. Jak i mašyny na biełaruskich numarach, jany pryznačany vyklučna dla vykarystańnia na terytoryi Biełarusi.
A sam pa sabie fakt vykarystańnia mašyn, zarehistravanych u Rasii, całkam zakonny.
Arhanizacyi ŭ Biełarusi mohuć vykarystoŭvać aŭtamabili na rasijskim uliku, aformiŭšy lizinh abo arendu (u tym liku ŭnutrychołdynhavuju — u hałaŭnoj kampanii z Rasii).
I pakolki pierarehistracyja aŭto — heta dadatkovyja ciełaruchi i vydatki, hetyja mašyny praciahvajuć pracavać sa starymi numarami, tolki ŭ inšaj krainie.
Ilustracyjny zdymak. Fota: «Naša Niva»
Inšy važny momant, čamu kampanija nie źmianiaje prapisku, moža być u tym, što mašyny ŭ Rasii ŭ cełym kaštujuć daražej, čym u Biełarusi, dy i rynak tam bolšy, tamu kampanii paśla budzie praściej i vyhadniej pradać hetaje aŭto ŭ Rasii.
Nie tolki ŭ Biełarusi pracujuć aŭto z zamiežnaj rehistracyjaj
Padobnaja praktyka z vykarystańniem aŭto na zamiežnaj rehistracyi źjaŭlajecca raspaŭsiudžanaj u Jeŭrasajuzie.
Naprykład, u susiedniaj Litvie možna ŭbačyć karšerynhavyja aŭto na łatvijskich i navat estonskich numarach. A ŭ dastaŭcy litoŭskaj kramy možna ŭbačyć mikraaŭtobusy, zarehistravanyja ŭ Polščy.