Ad Baldur’s Gate 3 da Minecraft: źjaviŭsia sajt-katałoh, dzie sabrany 180 videahulniaŭ pa-biełarusku

Novy resurs sistematyzuje dla hiejmieraŭ jak aficyjnyja biełaruskija łakalizacyi hulniaŭ, tak i fanackija pierakłady — bolš nie treba šukać fajły pa roznych forumach i staronkach ličbavych kram.

Kadr z The Elder Scrolls IV: Oblivion Remastered, jakaja dastupna pa-biełarusku

Aŭtaram prajekta pad nazvaj belarusian.games vystupiŭ raspracoŭščyk Uładzisłaŭ Łapko. Pra źjaŭleńnie i techničnyja asablivaści pracy hetaha hulniavoha chaba paviedamiŭ telehram-kanał BelKantent.

Napaŭnieńnie bazy sa 180 hulniaŭ šmat u čym aŭtamatyzavana: sistema samastojna źbiraje danyja praz API, a čarnavy pierakład apisańniaŭ vykonvajecca z dapamohaj štučnaha intelektu Gemini 2.5 pierad finalnaj ručnoj maderacyjaj. 

Hałoŭnaja staronka sajta. Skrynšot

Dla zručnaha pošuku karystalniki mohuć adfiltravać kantent pa piaci asnoŭnych katehoryjach: łakalizatar, płatforma, krama, žanr i teh. Heta dazvalaje ŭ niekalki klikaŭ adździalić prafiesijnyja pierakłady ad amatarskich madyfikacyj abo znajści hulniu pad kankretnuju apieracyjnuju sistemu.

Asablivuju ŭvahu pryciahvaje kolkaść prajektaŭ, jakija ŭžo dastupnyja pa-biełarusku, u tym liku dziakujučy ruplivaj pracy supolnaści pierakładčykaŭ.

Siarod hulniaŭ pa-biełarusku prysutničajuć sapraŭdnyja tytany industryi, takija jak maštabnaja rolevaja hulnia Baldur's Gate 3, jakaja stała biassprečnym tryumfataram i najlepšaj hulnioj 2023 hoda, a taksama vybitny intelektualny detektyŭ Disco Elysium — The Final Cut, pryznany adnoj z najlepšych siužetnych hulniaŭ u historyi.

U bazie prysutničajuć kultavy postapakaliptyčny šutar S.T.A.L.K.E.R.: Shadow of Chernobyl i niadaŭni praciah sieryi S.T.A.L.K.E.R. 2: Heart of Chornobyl. Nie zastalisia pa-za ŭvahaj i lehiendarnyja ekšany: hulcy mohuć prajści na rodnaj movie znakamituju Half-Life 2 razam ź jaje maštabnym fanackim remiejkam Black Mesa, a taksama zhulać u samy papularny ŭ śviecie šmatkarystalnicki kamandny šutar Counter-Strike.

Staronka The Elder Scrolls IV: Oblivion Remastered, jakaja vyjšła letaś. Skrynšot

Amataram kłasiki dastupnyja rolevyja epiki The Elder Scrolls V: Skyrim, The Elder Scrolls IV: Oblivion Remastered, Fallout: New Vegas i histaryčnaja Kingdom Come: Deliverance.

Na sajcie možna znajści pierakłady dla samaj papularnaj piasočnicy ŭ śviecie Minecraft, hłybokaha navukova-fantastyčnaha simulatara kałonii RimWorld, zmročnaj i atmaśfiernaj mietraidvanii Hollow Knight, nadzvyčaj paśpiachovaha ŭtulnaha simulatara fiermiera Stardew Valley i chardkornaha płatformiera Celeste.

Dapaŭniajuć karcinu maštabnyja stratehii ź sieryj Sid Meier's Civilization i Mount & Blade, kaapieratyŭnyja chity Deep Rock Galactic i Don't Starve Together, a taksama prastoravaja hałavałomka Portal ad kampanii Valve i napružany chorar Outlast.

Asobnym zdabytkam ličbavaj biblijateki źjaŭlajecca najaŭnaść prajektaŭ z poŭnaj biełaruskaj ahučkaj. Choć takich hulniaŭ u katałohu pakul tolki piać, jany achoplivajuć roznyja žanry.

Pačuć hałasavoje supravadžeńnie na rodnaj movie siońnia možna va ŭžo zhadanaj hulni-hałavałomcy Portal i jaje tematyčnym śpin-ofie Bridge Constructor Portal. Taksama biełaruskuju ahučku majuć biaspłatny futbolny simulatar novaha pakaleńnia UFL, histaryčnaja pryhodnickaja hulnia ŭ dekaracyjach Biełarusi XIII stahodździa Tales of Meadows i dynamičnaja kazualnaja arkada Beat Bound by arficord.

Kamientary da artykuła