Zialenski sustrakaŭsia z rasijskim miljarderam Abramovičam, kab pieradać Pucinu pasłańnie

Sustreča była ŭ Kijevie ŭ mai.

Raman Abramovič. Fota: AP

Prezident Ukrainy Uładzimir Zialenski ŭ mai sustrakaŭsia ŭ Kijevie z rasijskim miljarderam, byłym uładalnikam futbolnaha kłuba «Čełsi» Ramanam Abramovičam, kab pieradać Uładzimiru Pucinu paviedamleńnie pra mirnyja pieramovy, paviedamlaje Financial Times sa spasyłkaj na čatyroch čałaviek, znajomych ź situacyjaj.

Zialenski paprasiŭ Abramoviča pieradać Pucinu, što jon hatovy sustrecca dla praviadzieńnia pieršaha dvuchbakovaha samitu z 2022 hoda.

Paviedamleńnie, jakoje Zialenski pieradaŭ praz Abramoviča, było padobnaje da adkrytaha lista Pucinu, jaki Zialenski apublikavaŭ raniej. Ale ton byŭ mienš antahanistyčnym.

Kijeŭ spadziajecca, što tut syhrajuć na ruku jaho pośpiech u prypynieńni rasijskaha nastupu (jaki zapavoliŭsia da minimumu ŭ apošnija miesiacy) i naniasieńnie škody z dapamohaj dalnabojnych pavietranych udaraŭ uhłyb Rasii.

Adnak Pucin pa-raniejšamu ŭpeŭnieny, što pieravaha Rasii ŭ resursach u rešcie rešt źniasilić Ukrainu, i nie vyjaviŭ nijakaj cikavaści da sustrečy ź Zialenskim.

Pucin zajaviŭ u piatnicu, što 21 maja, paśla pajezdki biznesmiena ŭ Kijeŭ, sustreŭsia z adnym z pradstaŭnikoŭ biznes-kołaŭ i skazaŭ jamu, što nie bačyć sensu ŭ sustrečy ź Zialenskim.

Rasijski prezident dadaŭ, što biznesmien nie dziejničaŭ u aficyjnaj jakaści.

Abramovič dapamahaje vystupać pasiarednikam u pieramovach pamiž Rasijaj i Ukrainaj ź pieršych tydniaŭ vajny ŭ 2022 hodzie.

Aliharch udzielničaŭ u arhanizacyi raŭnda pieramoŭ u Stambule ŭ sakaviku 2022 hoda. Paźniej u tym ža hodzie Abramovič taksama dapamoh zaklučyć pahadnieńnie ab zabieśpiačeńni ekspartu ŭkrainskaha zbožža praz Čornaje mora.

Chacia rola Abramoviča stała mienš prykmietnaj z taho času, jak u minułym hodzie Rasija pačała vieści pieramovy niepasredna z ZŠA, jon zastajecca ŭciahnutym u abmien pałonnymi i inšyja dvuchbakovyja pieramovy z Ukrainaj, u tym liku pa aśpiektach zabłakavanaha mirnaha płana, jaki prasoŭvali ZŠA, paviedamlajuć blizkija da jaho ludzi.

Kamientary da artykuła