Uładzimir Zialenski źviarnuŭsia da Pucina z adkrytym listom, jaki nahadvaje ŭltymatum

Kali vy bolš za 26 hadoŭ tamu ŭznačalili Rasiju, šmat chto va Ukrainie staviŭsia da vas pazityŭna. Tak było. Heta ŭžo ŭ minułym.

Zaraz absalutnaja bolšaść ukraincaŭ usprymaje pazityŭna toje, što našy dalnabojnyja drony zavitali na adkryćcio vašaha forumu ŭ Pieciarburhu, pieraadoleŭšy adlehłaść u bolš čym 1000 kiłamietraŭ. Jak vy dobra viedajecie, hetaja adlehłaść nie źjaŭlajecca miažoj našych mahčymaściaŭ.

26 hadoŭ vašaj ułady całkam źmianili paradak dnia ŭ adnosinach pamiž Ukrainaj i Rasijaj. Ad abmierkavańniaŭ tavaraabarotu i inšych cyvilnych pytańniaŭ našy narody pierajšli da tematyki vyklučna traplańniaŭ i strat.

Amal pałovu z vašych 26 hadoŭ ułady ŭ Rasii vy praviali ŭ vajnie suprać Ukrainy.

Što b vy ni havaryli pra NATA, hieapalityku i ruskuju movu, hetaja vajna źjaŭlajecca vašym asabistym vybaram — vajnoj biez realnaj pryčyny. Mienavita tak heta zapomnić historyja.

Hety čas moh by prajści zusim inakš.

My časta čujem, što vajna vas zadavalniaje. Viadoma, nie ŭ tych vypadkach, kali havorka idzie pra biaśpieku vašaj rezidencyi na Vałdai ci paradu ŭ Maskvie. Vaša ŭłasnaje žyćcio dla vas kaštoŭnaje.

Ale zaraz my ŭsie bačym, što heta narešcie pierastaje zadavalniać rasijan — toje, što vajna prynosić usio bolš niehatyvu Rasii.

Im nie padabajucca našy drony i rakiety.

Im nie padabajecca deficyt bienzinu i pastajanny rost cen.

Im nie padabajucca pastajannyja zabarony.

Im nie padabajecca vaš namier zładzić druhuju chvalu mabilizacyi, kab pašyryć vajnu na inšy kirunak va Ukrainie ci nakiravać suprać niejkich jašče krain — susiedziaŭ Rasii.

Im nie padabajecca, što vašaj vajnie nie bačna kanca.

Tak, vy jašče dahetul možacie prymušać rasijan tak isnavać.

Ale vašy resursy istotna skaračajucca.

U vas nie chopić hrošaj i palityčnaj siły, kab i nadalej kuplać łajalnaść rasijan, jak vy heta rabili 26 hadoŭ. My budziem rabić usio, kab śviet pra heta pakłapaciŭsia.

Jak vy sami kažacie, «treba ŭsio padličyć».

Učora ja atrymaŭ dakład pra straty vašaj armii na froncie va Ukrainie ŭ mai. Heta znoŭ bolš za 30 tysiač zabitych i ciažkaparanienych rasijan. My trymajem mienavita taki pakazčyk štomiesiac, i nakont kožnaj vašaj straty ŭ nas jość videapaćviardžeńnie — heta nie hałasłoŭna.

My viedajem, što ŭ vašych stratach na froncie 63 pracenty — heta zabityja, i tolki 37 pracentaŭ — paranienyja. U XXI stahodździ armii nie mohuć dazvalać sabie takoha bałansu. Nadalej dola zabitych vyraście.

Nie toje kab my va Ukrainie pieražyvali za rasijan. Paśla ŭsiaho, što pryniesła va Ukrainu vaša vajna.

Ale ja kłapačusia pra ŭkraincaŭ.

My hublajem svaich ludziej, i kožnaja naša strata nam balić. I navat kali ŭzrovień strat ukrainskich adzin da piaci ci adzin da šaści ŭ paraŭnańni sa stratami rasijskimi, heta ŭsio adno maje vialikaje značeńnie.

Jak maje značeńnie i toje, što vy ŭžo rehularna, raz na niekalki miesiacaŭ, pieranosicie krajnija terminy zachopu našych rehijonaŭ, pierš za ŭsio Danieckaj vobłaści. Vy nie zachopicie jaje i sioleta.

Ale my va Ukrainie nie chočam pastajannaj vajny. My dobra viedajem, što biez vajny biaźmierna lepš. My chočam dasiahnuć hetaha.

Ja ŭpeŭnieny, što bolšaść rasijan hatovaja dać na heta stanoŭčy adkaz, i vy pra heta viedajecie.

Šmat chto nie vieryŭ, što Ukraina pratrymajecca stolki času ŭ abaronie.

Vy nie vieryli. I tyja, chto vam raiŭ, taksama nie vieryli. Heta było pamyłkaj.

Vy nie čakali paŭnamaštabnaha supracivu ad Ukrainy i nie prahnazavali, što ŭsio zajdzie tak daloka. Ale my ŭsie tut — na piatym hodzie paŭnamaštabnaha sutyknieńnia.

Nie bojciesia vyjści z vajny — heta hałoŭnaje, što zaraz ad vas patrabujecca.

Ukraina zachoŭvaje niezaležnaść. I zachavaje. Nasupierak lubym inšym prahnozam.

My abjadnali mnohich u śviecie na abaronu Ukrainy i suprać vas. My znajšli zbroju i finansy.

My atrymlivajem padtrymku, vy — sankcyi. I tak budzie praciahvacca, pakul nie budzie spraviadlivaści dla Ukrainy, jakoj my chočam i jakaja moža być dasiahnuta.

My nie damo dasiahnuć pośpiechu tym, chto sprabuje vas pierakanać, što sankcyi suprać Rasii buduć adčuvalna pasłablenyja i što padtrymka Ukrainy budzie adčuvalna skaročanaja bieź istotnych źmien u vašaj pazicyi adnosna Ukrainy. Prykład Orbana demanstruje, jakoj hańbaj zakančvajuć tyja, chto vybiraje dapamahać Rasii ŭ vajnie suprać nas.

Ukraina prajšła ciažkija zimy, kali vy sprabavali źniščyć našu enierhietyku. My vystajali, i navat u ciemry stojkaść ukraincaŭ zachavałasia.

My pieranieśli vajnu na vašu terytoryju, i vy b nie spravilisia z hetym biez dapamohi Paŭnočnaj Karei. Vy pieršy kiraŭnik Rasii, jaki byŭ zmušany źviartacca pa dapamohu ŭ Pchieńjan.

I siońnia vy całkam zaležycie ad Kitaja — taksama ŭpieršyniu ŭ historyi Rasii.

Vy raźličvali, što ŭkraincam nie chopić sił abaranić siabie, ale ciapier našy chłopcy dapamahajuć budavać abaronu našym partnioram na Blizkim Uschodzie i ŭ Zalivie.

Vy spadziavalisia na ŭnutranuju smutu va Ukrainie, ale heta suprać vas uzbuntavalisia vašyja ž vajskovyja farmavańni. 23 červienia budzie čarhovaja hadavina, i zamoŭčvańnie nie satre z historyi hety fakt.

I heta zaraz na vas hladziać ź vidavočnaj stomlenaściu vašyja ž čynoŭniki, biznesmieny i prapahandysty. Śviet heta bačyć.

U śvietu niama stomlenaści ad Ukrainy, na jakuju vy doŭha raźličvali. A voś ad Rasii jość stomlenaść navat u tych u hłabalnym śviecie, chto dapamahaje vam abychodzić sankcyi i padtrymlivać na płavu ekanomiku.

Vy nie možacie hetaha nie zaŭvažać. Paśla 26 hadoŭ staraść pačała brać svajo. Čym dalej, tym bolšaj budzie stomlenaść i ad vas.

My bačyli dakumienty ad raźviedki, što vy zaraz razhladajecie płany vajny jašče i na 2027 i 2028 hady. Taksama my viedajem, što vy spadziajeciesia, što balistyka zrobić dla vas toje, čaho nie zrabiła ŭsio inšaje. Vy chočacie ŭciahnuć jašče bolš u vajnu Biełaruś, i zaraz my zmušanyja rychtavacca jašče i da hetaha. My bačym, što vy razyhryvajecie niejkuju partyju z Prydniastroŭjem. Vašy prapahandysty pahražajuć tak ci inakš usim susiedziam Rasii. Ci sapraŭdy vy chočacie prajści praz usio heta?

Vybar zaraz za vami.

Davoli vajny.

Ukraina prapanuje skončyć hetu vajnu.

Treba zrabić heta sumlenna, hodna i harantavać, što nie budzie novaha raspalvańnia vajny.

My bačym, što Złučanyja Štaty nadajuć usiu svaju ŭvahu pytańniu Irana, i niapravilna prosta čakać, kali ŭ ichniaj uvazie čarha dojdzie da vajny ŭ Jeŭropie.

Ukraina prapanuje skončyć vajnu ŭ farmacie pamiž nami i vami.

Ja prapanuju vam sustreču.

Usie čuli, jak vašy pradstaŭniki, uśmichajučysia, havaryli, što ja nibyta mahu pryjechać u Maskvu. Ale paśla takich 26 hadoŭ ukrainskamu lidaru ŭ vašaj stalicy, jak i rasijskamu lidaru ŭ Kijevie, rabić niama čaho.

Jość krainy, jakija tradycyjna prymajuć lidaraŭ dla vyrašeńnia pytańniaŭ vajny i miru. Šviejcaryja, Turcyja, krainy Arabskaha śvietu — šmat chto moža i choča pryniać hetuju sustreču.

Mienavita lidary vyrašajuć klučavyja pytańni — tak było i budzie zaŭsiody.

Ja prapanuju vyznačyć dakładnuju datu sustrečy.

My čuli, što vam paabiacali na Alascy vyrašeńnie niejkich rečaŭ, jakija tyčacca Ukrainy i Jeŭropy. Ale vy bačycie, što ŭkrainskija i jeŭrapiejskija pytańni vyrašajucca nie ŭ Ankorydžy.

Da pačataha pamiž nami dvuchbakovaha treka mohuć dałučycca inšyja vyznačanyja ŭdzielniki.

Pakolki vajna praciahvajecca ŭ Jeŭropie, i nam va Ukrainie patrebny harantyi biaśpieki, i vy dla siabie chočacie harantyj biaśpieki, łahičnym padajecca ŭdzieł tych, chto sapraŭdy moža vystupić harantami.

My ličym, što ŭdzieł Jeŭropy patrebny — tych, chto sapraŭdy maje zdolnaść upłyvać na situacyju.

My ličym, što Złučanyja Štaty pavinny być u pracesie, i heta toje, što moža vyznačyć kanfihuracyju novaj architektury biaśpieki ŭ našaj častcy śvietu.

My ŭžo mieli dośvied mnohich damoŭ z Rasijaj i Minskich pahadnieńniaŭ, jakija nie spracavali. Tamu treba znajści pierš za ŭsio našy dvuchbakovyja adkazy na pytańni, jakija jość, i nie chavacca ad składanych pytańniaŭ za lubymi farmuloŭkami, techničnymi hrupami abo strataj času ŭ čaŭnočnaj dypłamatyi.

Svajoj vajnoj vy nazaŭždy raźmiežavali Ukrainu i Rasiju.

Linija frontu zaraz — heta linija, ź jakoj pavinna pačacca dypłamatyja.

Ukraina hatovaja spynić ahoń całkam — na čas, pakul buduć tryvać pieramovy. I heta standartnaja praktyka, jakuju paćviardžajuć zaraz i abstaviny vakoł Irana. Sproba ŭstalavać realnuju cišyniu — heta najlepšy start, kab pačać havaryć adzin z adnym. My ličym, što heta budzie nie prosta sprobaj, a realnym spynieńniem ahniu, kali vy hetaha zachočacie.

Vy viedajecie, što manitorynh spynieńnia ahniu pa linii prypynieńnia mohuć zabiaśpiečyć Złučanyja Štaty.

Ukraina hatovaja da abmienu vajennapałonnymi pa pryncypie «ŭsich na ŭsich», i heta moža stać dobrym prałoham da zakančeńnia vajny.

Treba zrabić surjoznyja kroki dla viartańnia cyvilnych i dziaciej, jakija byli vyviezienyja na praciahu vajny.

Treba vyznačyć, jakoj budzie budučynia dla ŭsich nastupnych pakaleńniaŭ ukraincaŭ i rasijan.

Kali vy asabista ŭ svaich dumkach nie pryjdziecie da idei, što hetuju vajnu para zaviaršać, Ukraina praciahnie zmahacca za svajo isnavańnie. U nas buduć tyja, chto nas padtrymaje.

Ale i vam daviadziecca značna bolš zmahacca za vaša isnavańnie — nie Rasii, a vaša asabistaje. I heta nie pahroza ad mianie ci Ukrainy. Heta fakty rasijskaj historyi, jakija vy dobra viedajecie: kali Rasija stamlajecca, adbyvajucca źmieny.

My možam pracavać na takuju stomlenaść.

Vy možacie spynić svaju vajnu.

Viečnaja pamiać usim, čyje žyćci byli zabranyja hetaj vajnoj.

Słava Ukrainie!

• 12
• 0
• 0
• 1
• 0
• 0
• 0
• 0