Babrujski ŭchilant biehaŭ ad vojska, pakul nie złavili. Paśla dembiela pajechaŭ vajavać za Pucina — u adzin kaniec
Stała viadoma pra hibiel na froncie jašče adnaho biełarusa, jaki pajšoŭ vajavać za Rasiju. 29‑hadovy Andrej Mihaj na radzimie biehaŭ ad vajenkamata, ale słužyć usio ž prymusili. Paśla pierabraŭsia ŭ Rasiju, znajšoŭ sabie rasijanku i vyrašyŭ sarvać kuš.
Andrej Mihaj naradziŭsia ŭ Babrujsku ŭ sakaviku 1996-ha.
Skončyŭ Babrujski dziaržaŭny ahrarna-ekanamičny kaledž, pa dadzienych Belpol, u Mihaja była sudzimaść za ŭchileńnie ad vojska. Adnak, usio ž adsłužyŭ.
Andrej Mihaj. Fota: «UKantakcie»
Paśla dembiela źjechaŭ u Rasiju, znajšoŭ tam dziaŭčynu, pracavaŭ na budoŭli zvarščykam. Pa jakoj pryčynie ŭ kancy 2025‑ha vyrašyŭ jechać na front — nieviadoma.
U lutym 2026 hoda, paśla vučebki, biełarusu davieryli kiravać padraździaleńniem ź dziasiatka śmiarotnikaŭ, jakoje kidali ŭ miasnyja šturmy. Sam Mihaj pry hetym taksama byŭ šturmavikom, prosta na papiery — načalnikam.
Užo 13 sakavika 2026 hoda Mihaja, pa słovach jaho dziaŭčyny, pryznali bieź źviestak źnikłym, a 6 maja vyjaviłasia praŭda — Mihaj zahinuŭ.
Andrej Mihaj, fota z archiva byłoj dziaŭčyny
Nastupnaja hrupa rasijskich šturmavikoŭ sfatahrafavała cieły tych, chto zahinuŭ da ich. U adnym z trupaŭ svajaki Mihaja i apaznali jaho — pa fotazdymku śpiny z charakternymi adznakami.
Žyvy Andrej Mihaj (źleva) na viasielli ŭ Biełarusi. Fota: UKantakcie
Rasijskaja armija nie biare na siabie ryzyku evakuacyi cieł u rajonach aktyŭnych bajavych dziejańniaŭ — usio, što ruchajecca, źniščajuć ukrainskija drony. Tamu dadomu, u Babrujsk, pryjechaŭ tolki rasijski vajenny bilet i žeton bajca 506 motastrałkovaha pałka 27 hvardziejskaj dyvizii.