U Biełarusi zapuskajuć pieršy zavod z poŭnym cykłam vytvorčaści viski

U Fanipali Dziaržynskaha rajona rychtujecca da zapusku pieršaja ŭ krainie dystyleryja poŭnaha cykłu pa vytvorčaści viski — «Sajuz». Pradpryjemstva płanujuć uvieści ŭ ekspłuatacyju da kanca červienia 2026 hoda, piša Tochka.by.

Fota: fanipol.by

Viski buduć vyrablać pavodle kłasičnaj šatłandskaj technałohii z vykarystańniem biełaruskaha jačmieniu, vyraščanaha ŭ Dziaržynskim rajonie. Vytvorčaść budzie ŭklučać usie etapy: ad pierapracoŭki ziernia i zakisańnia da pierahonki, vytrymki ŭ dubovych bočkach i raźlivu hatovaj pradukcyi.

Na zavodzie ŭžo pastavili dva miednyja pierahonnyja kuby — ałambiki, jakija atrymali nazvy «Kazimir» i «Barbara». Ličycca, što mienavita miedź dapamahaje ačyščać śpirt ad niepažadanych damieškaŭ i farmiravać charakterny vodar napoju.

Fota: fanipol.by

Paśla zapusku vytvorčaści dla naviedvalnikaŭ arhanizujuć ekskursii. Hości zmohuć ubačyć uvieś praces stvareńnia viski, daviedacca pra asablivaści vytrymki ŭ dubovych bočkach, a taksama pra ŭpłyŭ syraviny na smak i vodar napoju.

Dla paŭnaletnich naviedvalnikaŭ praduhledžanyja dehustacyi. Na druhim paviersie pradpryjemstva ŭžo abstalavali lektoryj dla adukacyjnych prahram i sustreč.

Prajekt realizuje kampanija «DH-Centr», viadomaja taksama vytvorčaściu čornaj ikry pad brendam Admiral Husso. Tamu ekskursiju na dystyleryju možna budzie sumiaścić z naviedvańniem asiatrovaha kompleksu, raźmieščanaha pobač.

Paviedamlajecca, što školnikaŭ na vytvorčaść zaprašać nie płanujuć, adnak dla studentaŭ profilnych śpiecyjalnaściaŭ takija ekskursii mohuć vykarystoŭvacca ŭ adukacyjnych metach.

Kamientary da artykuła