U Rasii praciahvajuć šukać, čym jašče možna ŭkałoć Armieniju

Kiraŭnik MZS Rasii Siarhiej Łaŭroŭ paviedamiŭ, što krainy ADKB abmierkavali mahčymaść prymianieńnia pałažeńniaŭ statuta arhanizacyi ŭ suviazi z tym, što Armienija bolš za dva hady nie vypłačvaje ŭznosy ŭ jaje biudžet.

Siarhiej Łaŭroŭ. Fota: Alexander Nemenov / Pool Photo via AP

Pavodle artykuła 25 statuta ADKB dziaržava, jakaja maje zapazyčanaść bolš za dva hady, moža być pazbaŭlena prava vyłučać svaich hramadzian na kvotnyja pasady ŭ arhanizacyi i prava hołasu ŭ jaje orhanach da poŭnaha pahašeńnia zapazyčanaści.

U 2024 hodzie premjer-ministr Armienii Nikoł Pašynian abviaściŭ ab prypynieńni ŭdziełu krainy ŭ ADKB, paśla čaho armianskija ŭłady spynili finansavańnie arhanizacyi. Paźniej u Jerevanie nieadnarazova zajaŭlali, što bolš vierahodnym ličać vychad z ADKB, čym viartańnie da aktyŭnaha ŭdziełu ŭ joj.

Asobna Siarhiej Łaŭroŭ zakranuŭ pytańnie jeŭrapiejskaj intehracyi Armienii. U sakaviku 2025 hoda parłamient krainy pryniaŭ zakon ab pačatku pracesu dałučeńnia da Jeŭrapiejskaha sajuza. Pry hetym armianski MZS padkreślivaŭ, što hety dakumient nie źjaŭlajecca aficyjnaj zajaŭkaj na ŭstupleńnie ŭ ES, a adlustroŭvaje namier pahłyblać supracoŭnictva ź Jeŭrasajuzam.

Na dumku rasijskaha ministra, udzieł u Jeŭrazijskim ekanamičnym sajuzie (JEAES) i mahčymy ruch da členstva ŭ Jeŭrapiejskim sajuzie patrabujuć vyznačeńnia dalejšaha kursu Armienii, bo praviły funkcyjanavańnia hetych abjadnańniaŭ, pavodle pazicyi Maskvy, nie sumiaščalnyja.

U svaju čarhu, aficyjnaja pradstaŭnica MZS Rasii Maryja Zacharava zajaviła, što Rasija nie ličyć mahčymym zachavańnie Armienijaj usich ekanamičnych pieravah udziełu ŭ JEAES pry adnačasovaj padrychtoŭcy da intehracyi ŭ inšy ekanamičny błok. Jana taksama raskrytykavała palityku Jeŭrapiejskaha sajuza ŭ dačynieńni da Armienii i vykazała mierkavańnie, što ES vykarystoŭvaje supracoŭnictva z krainaj u svaich hieapalityčnych intaresach.

Kamientary da artykuła