U Hrodnie dziaŭčatam 14 i 15 hadoŭ pahražaje kałonija za šopinh u internecie
Padletki bavili čas tym, što sprabavali zajści ŭ čužyja profili na papularnym markietpłejsie, naŭhad uvodziačy roznyja telefonnyja numary. Udałaj stała sproba z raniejšym numaram ich znajomaj — sistema puściła školnic u čužy akaŭnt.
Fota: vecteezy.com
Hrodzienskija školnicy, 14 i 15 hadoŭ, pierabirali numary dla ŭvachodu na handlovuju placoŭku, pakul vypadkova ŭ ich heta nie atrymałasia.
Ubačyŭšy, što da profilu pryviazanaja čužaja bankaŭskaja karta, dziaŭčyny nie spynilisia. Jany pačali masava zakazvać tavary. Ahulnaja suma padletkavaha šopinhu za čužy košt skłała amal 4 000 rubloŭ.
Sapraŭdnaj uładalnicaj akaŭnta i hrošaj akazałasia 53‑hadovaja žycharka Ivacevickaha rajona. Zaŭvažyŭšy, što z karty źnikli vielizarnyja hrošy, žančyna pajšła ŭ milicyju. Dziaŭčat vyličyli.
Ciapier u dačynieńni da niepaŭnaletnich raspačata kryminalnaja sprava za kradziež majomaści šlacham madyfikacyi kampjutarnaj infarmacyi, ździejśnieny hrupaj asob.
Kryminalnaja adkaznaść za takija kampjutarnyja kradziažy ŭ Biełarusi nadychodzić užo z 14 hadoŭ.
Školnicam ciapier pahražaje da 5 hadoŭ pazbaŭleńnia voli.
Čamu tak zdaryłasia
Milicyja nahadvaje: kali čałaviek pierastaje karystacca SIM-kartaj, mabilny apieratar praz paŭhoda-hod pradaje hety numar inšamu klijentu. Kab vašy staryja numary nie stali lohkaj zdabyčaj dla inšych, pierad błakiroŭkaj simki abaviazkova treba:
adviazać stary numar ad usich markietpłejsaŭ (Wildberries, Ozon, AliExpress) i prapisać tam novy;
adklučyć numar ad internet-bankinhu i bankaŭskich kart (praz mabilny dadatak abo ŭ adździaleńni banka);
źmianić numar va ŭsich miesiendžarach i sacyjalnych sietkach, uklučajučy Telegram, Viber, Instagram i akaŭnty Google.