Biełaruskaja čyhunka pryznačyła 14 dadatkovych ciahnikoŭ dla śviatkavańnia Kupalla ŭ Aleksandryi

Biełaruskaja čyhunka paviedamiła pra pryznačeńnie 14‑ci dadatkovych ciahnikoŭ na čas praviadzieńnia respublikanskaha śviata «Kupalle» («Aleksandryja źbiraje siabroŭ»), jakoje adbudziecca 11—12 lipienia 2026 hoda ŭ ahraharadku Aleksandryja Škłoŭskaha rajona.

Zdymak ilustracyjny. Fota z sacsietak

Takoje rašeńnie, jak paviedamlajecca, pryniata dla taho, kab palehčyć dastaŭku vialikaj kolkaści haściej da miesca praviadzieńnia mierapryjemstva i zabiaśpiečyć ich zručnaje viartańnie dadomu.

Najbolšaja kolkaść dadatkovych rejsaŭ budzie arhanizavana 11 lipienia. U hety dzień pa maršrutach Mahiloŭ — Kopyś — Mahiloŭ i Orša — Kopyś — Orša buduć kursavać 11 dadatkovych ciahnikoŭ rehijanalnych linij ekanamičnaha kłasa.

Z Mahilova dadatkovyja ciahniki buduć adpraŭlacca čatyry razy: a 13.25, a 15.30, 19.05 i a 21.30. Z Oršy buduć arhanizavanyja dva dadatkovyja rejsy — a 12.48 i a 22.25.

Kab udzielniki i hości śviata mahli zručna viarnucca paśla zaviaršeńnia asnoŭnych mierapryjemstvaŭ, u noč z 11 na 12 lipienia, a taksama ranicaj 12 lipienia budzie zapuščana jašče piać dadatkovych ciahnikoŭ, jakija buduć adpraŭlacca sa stancyi Kopyś u napramku Mahilova i Oršy.

Akramia hetaha, 11 lipienia ciahnik mižrehijanalnych linij biznes-kłasa, jaki chodzić pa maršrucie Połack — Mahiloŭ — Połack, zrobić dadatkovy prypynak na čyhunačnaj stancyi Kopyś. U vyniku na praciahu 11 i 12 lipienia na hetaj stancyi buduć spyniacca ahułam 29 ciahnikoŭ, jakija buduć źviazvać Kopyś z takimi haradami, jak Mahiloŭ, Orša, Viciebsk, Homiel, Połack i Brest.

Kamientary da artykuła