Bujny kantrakt na pastaŭku biełaruskaha kaliju zaklučyli ź Indyjaj
Indyja ŭkłała bujny kantrakt na zakupku biełaruskaha kaliju, što stała važnaj padziejaj dla suśvietnaha rynku minieralnych uhnajeńniaŭ, paviedamlaje rasijski «Kommiersant».
Zdymak ilustracyjny. Fota: Lookby.media
Pahadnieńnie pamiž Biełaruskaj kalijnaj kampanijaj i indyjskaj kampanijaj IPL praduhledžvaje pastaŭki standartnaha chłarydu kaliju ŭ 2026 hodzie pa canie 383 dalary za tonu.
Ekśpierty adznačajuć, što kantrakty z takimi bujnymi pakupnikami, jak Indyja i Kitaj, zvyčajna słužać aryjenciram dla ŭsiaho suśvietnaha rynku kalijnych uhnajeńniaŭ. Novaja cana na 34 dalary za tonu vyšejšaj za papiaredniuju, tamu jana moža stać šturškom dla dalejšaha rostu koštaŭ na kalij.
Na fonie hetaha kantrakt Kitaja na zakupku kaliju zastajecca adnym z samych tannych u śviecie — 348 dalaraŭ za tonu. Kitaj karystajecca vyhadnaj situacyjaj, aktyŭna pavialičvajučy zakupki i źbirajučy zapasy ŭ partach paśla zaviaršeńnia pasiaŭnoj kampanii.
U toj ža čas na rynku azotnych uhnajeńniaŭ nazirajecca inšaja situacyja. Paśla rostu cen, vyklikanaha prablemami z pastaŭkami praz spynieńnie sudnachodstva ŭ Armuzskim pralivie, vytvorcy sutyknulisia ź pieranasyčeńniem składoŭ, što pryviało da źnižeńnia cen na asobnyja vidy pradukcyi.
Čytajcie taksama:
Ministr transpartu Litvy: Cisku z boku ZŠA adnosna tranzitu biełaruskaha kaliju niama
MZS Litvy paćvierdziła, što kraina abmiarkoŭvaje z ZŠA pytańnie biełaruskich kalijnych uhnajeńniaŭ
ZŠA nieaficyjna paprasili try krainy źniać sankcyi ź biełaruskaha kaliju