Kampanija, jakaja chacieła zarabić na pastaŭkach u ES kalijnaj soli pad vyhladam soli dla daroh, kinuła «Biełaruśkalij» i zbankrutavała
Ekanamičny sud Minska pryznaŭ bankrutam «Jeŭrapiejskaje ahrarnaje ahienctva». Nie ŭsie z 60 kredytoraŭ, jakija raźličvali zarabić na schiemie, navat viernuć svaje inviestycyi. Hałoŭny kinuty — sam «Biełkalij».
5 maja 2026 hoda Ekanamičny sud horada Minska vynies rašeńnie pa spravie № 155NB2542: pryznać TAA «Jeŭrapiejskaje ahrarnaje ahienctva» (JEAA) bankrutam i adkryć likvidacyjnuju vytvorčaść.
Pracujučy jak dyler sielskahaspadarčaj techniki z 2016-ha, hetaja kampanija stała viadomaja tym, što ŭ 2020-ch, zrabiła ryzykoŭnuju staŭku na sprobu zarabić na niaprofilnym dla siabie biźniesie va ŭmovach sankcyj.
«Kibierpartyzany» razam z Supolnaściu čyhunačnikaŭ Biełarusi i žurnalistami Biełaruskaha rasśledavalnickaha centra vyjavili, što kampanija stała pastaŭlać u ES na toj momant padsankcyjnuju kalijnuju sol pad vyhladam soli dla pasypki daroh.
U hety biznes, imavierna, kampanija pajšła ŭ apošniaj nadziei palepšyć svajo finansavaje stanovišča: «Jeŭrapiejskaje ahrarnaje ahienctva» było emitentam ablihacyj, jakija ŭ 2024 nie zmahła pahasić.
Ale biznes z pastaŭkami sankcyjonki nie vyhareŭ.
Na momant sychodu ŭ bankructva mažarytarnym ułaśnikam kampanii (55%) źjaŭlajecca pryvatnaja estonskaja kampanija European Agricultural Agency, za jakoj stajać biełarusy Siarhiej Kupryjanovič i Alaksandr Bahačenka, a 45% u dački «Biełaruśkalija» — «Biełaruskalij-Ahra», jaki sam i padaŭ zajavu na bankructva, źjaŭlajučysia kredytoram kampanii.
Jak možna zrazumieć z materyjałaŭ spravy, najbolšy doŭh kampanii mienavita pierad «Biełaruśkalijem». Ale dakładnaja suma, jakuju «Jeŭrapiejskaje ahrarnaje ahienctva» pavinna «Biełaruśkaliju» za pastaŭki soli, nieviadomaja. Pa acenkach, jakija hruntujucca na raniejšych patrabavańniach, suma moža być kala 3 miljonaŭ rubloŭ.
Ahułam u rejestr uklučany patrabavańni 60 kredytoraŭ na 13 miljonaŭ rubloŭ. Aktyvy JEAA pa vynikach konkursnaj vytvorčaści acenienyja ŭ 11,8 miljona rubloŭ, ale 8,7 miljona ź ich — heta debitorskaja zapazyčanaść.
Hrošaj na raźlikovym rachunku zastałosia tolki 74 tysiačy rubloŭ.
Inšymi słovami, bolš za ŭsio prajhraŭ u situacyi «Biełaruśkalij». Biełarusy z Estonii — Bahačenka i Kupryjanovič — na pasiadžeńnie ŭ Minsku nie źjavilisia.
Ciapier čytajuć
U sacsietkach Chlastova apublikavałasia videa, zapisanaje na vypadak jaho zatrymańnia. Sam śpiavak na Akreścina23
Kamientary