MZS Biełarusi asudziła ataku na aŭtobus ź dziećmi i niečakana zaklikała spynić pajezdki ŭ pryhraničnyja z vajnoj rehijony Rasii
Ministerstva zamiežnych spraŭ Biełarusi vystupiła z aficyjnaj zajavaj nakont udaru pa aŭtobusie z homielskimi i rečyckimi školnikami ŭ Branskaj vobłaści Rasii. Pres-sakratar viedamstva Rusłan Varankoŭ paviedamiŭ, što Minsk rašuča asudžaje ataku, rasceńvaje jak «čarhovy akt teraryzmu suprać mirnaha nasielnictva» i patrabuje ad ukrainskaha boku «vyčarpalnych tłumačeńniaŭ».
Akramia taho, u zajavie MZS prahučaŭ niečakany napamin dla ŭłasnych viedamstvaŭ i hramadzian.
Dypłamaty adznačyli nieabchodnaść stroha kantralavać paradak arhanizacyi vyjezdu hrup biełarusaŭ, asabliva dziaciej, na adpačynak za miažu.
Bolš za toje, źniešniepalityčnaje viedamstva aficyjna padkreśliła «abaviazkovaść biezumoŭnaha vyklučeńnia» lubych pajezdak hramadzian u zony kanfliktaŭ, bajavych dziejańniaŭ i susiednich ź imi rehijonaŭ.
Takim čynam, MZS faktyčna pryznała niebiaśpieku maršrutaŭ, jakija pralahajuć praz pryhraničnyja vobłaści RF, i zapatrabavała spynić adpraŭku tudy ludziej.