«Pravakacyja Kramla». Va Ukrainie prakamientavali ŭdar pa biełaruskim aŭtobusie ź dziećmi
Zajavy pradstaŭnikoŭ Rasijskaj Fiederacyi pra nibyta paškodžańnie ŭkrainskim bieśpiłotnikam aŭtobusa ź dziciačaj futbolnaj kamandaj u Branskaj vobłaści nie adpaviadajuć rečaisnaści. Pra heta ŭ kamientary vydańniu «Lusterka» paviedamiŭ pres-sakratar Hienštaba USU major Andrej Kavaloŭ.
Paškodžany ŭ Branskaj vobłaści biełaruski aŭtobus
«Padkreślivajem, što ŭ nazvany pieryjad Siły abarony Ukrainy nie prymianiali bieśpiłotnyja latalnyja aparaty pa celach na terytoryi Branskaj vobłaści.
Rasceńvajem padobnyja paviedamleńni jak čarhovuju infarmacyjnuju pravakacyju Kramla. Nie majučy mahčymaści dasiahnuć zajaŭlenych metaŭ na poli boju i niesučy značnyja straty, Rasijskaja Fiederacyja ŭsio čaściej prybiahaje da infarmacyjnych manipulacyj i fabrykacyi abvinavačvańniaŭ suprać Ukrainy», — zajaviŭ pradstaŭnik USU.
Jon padkreśliŭ, što ŭ toj ža čas
«mienavita Rasija sistematyčna parušaje normy mižnarodnaha humanitarnaha prava, nanosiačy ŭdary pa ŭkrainskich haradach, žyłych kvartałach, balnicach, škołach i inšych cyvilnych abjektach».
«U vyniku apošnich rakietnych udaraŭ pa terytoryi Ukrainy, u pryvatnaści pa Kijevie, zahinuli dziasiatki mirnych žycharoŭ, siarod jakich jość dzieci», — nahadaŭ Kavaloŭ.
Miž tym Uzbrojenyja siły Ukrainy nanosiać udary vyklučna pa zakonnych vajennych celach i nie viaduć bajavych dziejańniaŭ suprać cyvilnaha nasielnictva, adznačyŭ jon.
Čytajcie taksama:
Adno dzicia, što trapiła pad abstreł u Branskaj vobłaści, znachodzicca ŭ ciažkim stanie