Pieramoha Biornema na vybarach adkryvaje jamu šlach da baraćby za pasadu premjera Brytanii
56‑hadovy vieteran lejbarysckaj palityki Biornem źjaŭlajecca samym papularnym palitykam u krainie. Ciapierašni premjer-ministr Kir Starmier u hetym rejtynhu — na 21‑m miescy.
Fota: Christopher Furlong/Getty Images
Mer Vialikaha Mančestera Endzi Biornem pieramoh na dadatkovych parłamienckich vybarach, što adkryvaje jamu šlach da baraćby za lidarstva ŭ Lejbarysckaj partyi i, patencyjna, za pasadu premjer-ministra Vialikabrytanii. Pazicyi siońniašniaha kiraŭnika ŭrada Kira Starmiera asłabli paśla razhromnych vynikaŭ lejbarystaŭ na municypalnych vybarach u mai, piša Bi-bi-si.
Biornem atrymaŭ pieramohu nad Robiertam Kieńjonam, kandydatam pravapapulisckaj partyi Reform UK Najdžeła Faradža.
Dadatkovyja parłamienckija vybary ŭ akruzie Mejkierfiłd na paŭnočnym zachadzie Anhlii byli pryznačanyja paśla taho, jak były deputat ad hetaj akruhi Džoš Sajmans skłaŭ paŭnamoctvy, kab rasčyścić šlach dla viartańnia Biornema ŭ parłamient.
Pa słovach Biornema, pieramoha ŭ Mejkierfiłdzie moža stać «pierałomnym momantam», jaki pryviadzie da «źmien, u jakich maje patrebu kraina».
Na miascovych vybarach 7 maja jak kiroŭnyja lejbarysty, tak i kansiervatary panieśli surjoznyja straty, sastupiŭšy značnuju častku hałasoŭ pravapapulisckaj partyi Reform UK Najdžeła Faradža i, u mienšaj stupieni, Partyi zialonych.
Paśla niaŭdałych vynikaŭ cisk na Starmiera ŭnutry partyi prykmietna ŭzmacniŭsia, adnak jon admoviŭsia sychodzić u adstaŭku.
Pośpiech Biornema moža stać adpraŭnoj kropkaj dla baraćby za lidarstva ŭ Lejbarysckaj partyi i pryvieści da źmieny kiraŭnika ŭrada. Sam Starmier, adnak, zajaŭlaŭ, što maje namier praciahvać pracu.
Kali Biornem, jak čakajecca, inicyjuje baraćbu za lidarstva, heta budzie ŭžo jaho treciaja sproba.
Jon dvojčy ŭdzielničaŭ u vybarach kiraŭnika partyi: u 2010 hodzie prajhraŭ Edu Milibendu, a ŭ 2015 hodzie — Džeremi Korbinu.
U vypadku źmieny premjer-ministra Vialikabrytanija moža atrymać užo siomaha kiraŭnika ŭrada za krychu bolš čym dziesiacihodździe.
«Heta apošni šaniec na źmieny»
U svajoj pieramožnaj pramovie Biornem źviarnuŭsia da členaŭ Lejbarysckaj partyi, nazvaŭšy vynik vybaraŭ «apošnim šancam na źmieny».
«Druhoha šancu nie budzie», — skazaŭ jon, dadaŭšy, što ciapier isnuje mahčymaść pabudavać «novuju palityku, zasnavanuju na adzinstvie i nadziei».
Vykazvajučy škadavańnie nakont taho, što jaho pieramoha aznačaje zaviaršeńnie pracy na pasadzie mera Vialikaha Mančestera, Biornem zajaviŭ, što pieraadoleć razryŭ pamiž poŭnačču i poŭdniem Anhlii niemahčyma «biez maštabnych źmien na nacyjanalnym uzroŭni».
«Ja zaŭsiody viedaŭ, što adnojčy viarnusia ŭ Viestminster, kab zaviaršyć niezavieršanuju spravu, kab Mejkierfiłd, Vialiki Mančestar i poŭnač Anhlii zmahli realizavać svoj patencyjał», — skazaŭ jon.
«Karol poŭnačy» Endzi Biornem
56‑hadovy vieteran lejbarysckaj palityki Biornem, pavodle vynikaŭ apytańniaŭ kampanii YouGov, źjaŭlajecca samym papularnym palitykam u krainie. Premjer-ministr Kir Starmier u hetym rejtynhu — na 21‑m miescy.
Biornem byŭ deputatam Pałaty hramadaŭ na praciahu 16 hadoŭ da abrańnia meram u 2017 hodzie i zajmaŭ roznyja pasady va ŭradach Toni Błera i Hordana Brauna.
U 2017 hodzie Biornem pieramoh na vybarach mera Vialikaha Mančestera — heta ahłamieracyja z nasielnictvam kala troch miljonaŭ čałaviek — i pakinuŭ Pałatu abščyn. Zatym jon jašče dvojčy pieraabiraŭsia meram, kožny raz pieramahajučy ź vialikim adryvam.
«Karalom poŭnačy» jaho nazyvali presa i palityki padčas pandemii karanavirusa, kali jon uziaŭ na siabie niefarmalnuju rolu pradstaŭnika ŭsioj paŭnočnaj častki Anhlii i adkryta spračaŭsia z Łondanam i tahačasnym uradam kansiervataraŭ nakont łakdaunaŭ i inšych supraćepidemičnych mier.
Pracedura vybaraŭ
Zhodna sa statutam Lejbarysckaj partyi, kab inicyjavać novyja vybary kiraŭnika partyi pry dziejučym lidary, jaki nie hatovy sychodzić, člen partyi pavinien:
— pa-pieršaje, być deputatam Pałaty hramadaŭ,
— pa-druhoje, sabrać podpisy 20% parłamienckaj frakcyi (ciapier — 81 podpis),
— pa-treciaje, atrymać padtrymku minimum troch źviazanych z partyjaj arhanizacyj, dźvie ź jakich pavinny być prafsajuzami.