Uvodzicca administracyjnaja adkaznaść dla apierataraŭ za drennuju sotavuju suviaź
Hetaje pałažeńnie ŭstupaje ŭ siłu siońnia, z 19 červienia.
U Biełarusi ŭvodzicca administracyjnaja adkaznaść dla apierataraŭ za drennuju sotavuju suviaź. Pra heta BiełTA paviedamili ŭ Ministerstvie suviazi i infarmatyzacyi.
Zakonam «Ab źmianieńni kodeksaŭ pa pytańniach administracyjnaj adkaznaści» uvodzicca administracyjnaja adkaznaść za parušeńnie apierataram sotavaj suviazi patrabavańniaŭ zakanadaŭstva da achopu terytoryi Biełarusi pasłuhami sotavaj suviazi i ich jakaści ŭ vyhladzie štrafu ŭ pamiery da tysiačy bazavych vieličyń (siońnia — da 45 tysiač rubloŭ). Hetaje pałažeńnie ŭstupaje ŭ siłu z 19 červienia.
Jak patłumačyli ŭ Minsuviazi, asnoŭnymi dakumientami ŭ pytańniach akazańnia pasłuh sotavaj ruchomaj elektrasuviazi źjaŭlajucca ŭkaz Łukašenki ad 26 žniŭnia 2024 hoda №335 i pastanova Savieta Ministraŭ ad 31 śniežnia 2024 hoda №1073.
U hetych dakumientach utrymlivajucca abaviazkovyja dla apierataraŭ sotavaj suviazi patrabavańni da achopu terytoryi krainy pasłuhami sotavaj suviazi i ich jakaści.
Abjektami kantrolu vykanańnia hetych patrabavańniaŭ źjaŭlajucca Minsk, abłasnyja i rajonnyja centry, harady i pasiołki haradskoha typu, a taksama astatniaja terytoryja Biełarusi, uklučajučy aŭtamabilnyja i čyhunačnyja darohi, nasielenyja punkty z kolkaściu nasielnictva 25 čałaviek i bolš.
Funkcyi kantrolu za achopam krainy pasłuhami sotavaj ruchomaj elektrasuviazi i ich jakaściu ŭskładzieny na Dziaržaŭnuju inśpiekcyju pa elektrasuviazi Ministerstva suviazi i infarmatyzacyi (BiełDIE).
BiełDIE ŭ vypadku vyjaŭleńnia faktu nievykanańnia sotavym apierataram patrabavańniaŭ da sotavaj suviazi viadzie administracyjny praces, vyznačaje vinavatuju asobu i nakiroŭvaje dakumienty ŭ sud dla pryniaćcia rašeńnia i vyznačeńnia pamieru štrafu.
Usia infarmacyja pra kantrol za vykanańniem patrabavańniaŭ da sotavaj suviazi nazapašvajecca ŭ sistemie «Chvala» (chvala.bieł) i dastupnaja apierataram dla płanavańnia mierapryjemstvaŭ pa likvidacyi vyjaŭlenych niedachopaŭ.